मुख्यमंत्री ह करिन ई-ऑफिस प्रणाली के तारीफ़
शासकीय कामकाज म बाढि़स पारदर्शिता: बेहतर परफ़ॉर्म करइया अधिकारी मन के होइस सराहना, अधिकारी मन ल स्व-मूल्यांकन करके सुधार करे के निर्देश
पूंजीगत व्यय अऊ शासकीय कामकाज के क्रियान्वयन के व्यापक समीक्षा
जेम पोर्टल ले होवइया शासकीय खरीदी के अनियमितता म होही कड़क कार्रवाई
मंत्रालय म उप सचिव स्तर ले वरिष्ठ अधिकारी मन खातिर 01 दिसंबर ले लागू होही बायोमैट्रिक अटेंडेंस
गुणवत्ता के संग निर्माण काम मन म लावंय तेजी, सुगम आवागमन खातिर सड़क मन के सुधार अऊ रखरखाव उपर ज़ोर
रायपुर, मुख्यमंत्री श्री विष्णु देव साय ह आज मंत्रालय महानदी भवन म विभागीय सचिव अऊ विभागाध्यक्ष मन के मैराथन बैठक लीन। उमन विकसित छत्तीसगढ़ के दिशा म आगू बढ़े खातिर अधिकारी मन ल विभागीय समन्वय अऊ टीम भावना के संग काम करे बर प्रेरित करिन।
मुख्यमंत्री श्री साय ह उच्च स्तरीय बैठक म पूंजीगत व्यय म तेजी, शासकीय कामकाज म पारदर्शिता, आमजन मन के समस्या मन के जल्दी निराकरण अऊ गुणवत्ता के संग निर्माण काम मन ल समय म पूरा करे के निर्देश दीन। उमन बेहतर प्रदर्शन करइया अधिकारी मन के सराहना करिन अऊ अधिकारी मन ल स्व-मूल्यांकन करके सुधार लाय खातिर कहिन।
मुख्यमंत्री श्री साय ह कहिन के ई-ऑफिस प्रणाली ले शासन के कामकाज म पारदर्शिता बाढ़े हे अऊ एखर से सुशासन के संकल्प साकार होवत हे। उमन प्रसन्नता जताईन के लगभग सबो विभाग मन म ई-ऑफिस प्रणाली लागू हो गे हे। बांचे विभाग दिसंबर 2025 तक एला अनिवार्य रूप ले लागू करंय। मुख्यमंत्री ह सुगम आवागमन खातिर सड़क मन के सुधार अऊ रखरखाव म विशेष बल दीन। संगेच, जेम पोर्टल ले होवइया शासकीय खरीदी म कोनो प्रकार के अनियमितता पाए जाय म कड़क कार्रवाई के निर्देश दीन।
मुख्यमंत्री ह कहिन के पूंजीगत व्यय ले राज्य के आधारभूत संरचना मज़बूत होथे अऊ दीर्घकालिक विकास के नींव परथे। उमन कम पूंजीगत व्यय वाले विभाग मन ल काम मन म गति लाय के निर्देश दीन। मुख्यमंत्री श्री साय ह कहिन के प्रदेश के रजत जयंती साल ल “अटल निर्माण वर्ष” के रूप म मनाया जात हे। ए साल के बजट म पाछू साल के तुलना म 18 प्रतिशत जादा प्रावधान करे गए हे। उमन अधिकारी मन ल निर्देश दीन के बजट म प्रावधानित काम मन के प्रशासकीय स्वीकृति समय म देहे जाय, स्वीकृत काम मन के टेंडर लउहे जारी होवय अऊ बिना विलंब काम चालू होवय।
उमन कहिन के पूंजीगत व्यय के सबो काम जनता के हित ले सीधा जुड़े हे, ते पाए के ए मन ल समय म पूरा करना जरूरी हे। जेन विभाग मन के व्यय पाछू साल के तुलना म कम हे, ओ मन ए कारन के पहिचान करके तुरंत सुधार करंय। मुख्यमंत्री ह कहिन के बरसात अब समाप्ति म हे, अइसन म अवइया दू महीना के सदुपयोग करत निर्माण काम मन ले संबंधित सबो औपचारिकता लउहे पूरा करंय।
जनता के समस्या मन ल धीरज ले सुनय अधिकारी
मुख्यमंत्री श्री साय ह विभागीय सचिव मन ले कहिन के आप मन सबो जनता के समस्या मन ल धैर्यपूर्वक सुनव अऊ ओखर निराकरण करव। उमन कहिन के सतत मॉनिटरिंग अऊ नियमित प्रवास ले विकास के गति बाढ़थे। प्रभारी सचिव अपन-अपन प्रभार वाले जिला मन के हर दू महिना म दौरा करके योजना मन के क्रियान्वयन के गहन समीक्षा करंय।
मंत्रालय के कामकाज म कसावट खातिर बायोमैट्रिक अटेंडेंस
मुख्यमंत्री श्री साय ह मंत्रालय के कामकाज म कसावट लाय के उद्देश्य ले 1 दिसंबर ले बायोमैट्रिक अटेंडेंस प्रणाली लागू करे के निर्देश दीन। उमन कहिन के अधिकारी समय म कार्यालय पहुँचंय अऊ अपन अधीनस्थ मन ल घलोक समयपालन खातिर प्रेरित करंय।
मुख्य सचिव श्री विकास शील ह मुख्यमंत्री ल अवगत कराइन के 1 दिसंबर ले मंत्रालय म उप सचिव स्तर ले वरिष्ठ अधिकारी मन तक खातिर बायोमैट्रिक अटेंडेंस प्रणाली लागू होही।
ए बेरा म मुख्य सचिव श्री विकास शील, अपर मुख्य सचिव श्री मनोज कुमार पिंगुआ, अपर मुख्य सचिव श्रीमती ऋचा शर्मा, मुख्यमंत्री के प्रमुख सचिव श्री सुबोध कुमार सिंह, मुख्यमंत्री के सचिव श्री पी. दयानंद, मुख्यमंत्री के सचिव श्री राहुल भगत संग सबो विभागीय सचिव अऊ विभागाध्यक्ष उपस्थित रहिन।