गोंदा फूल के खेती ले किसान हेमचंद साहू के बदलीस भाग

रायपुर, पारंपरिक धान के खेती ले सीमित आय कमइया छुरा विकासखण्ड के गाँव कसेकेरा के किसान हेमचंद साहू ह आधुनिक बागवानी तकनीक मन ला अपनाके सफलता के नवा मिसाल बन गए हे। राष्ट्रीय बागवानी मिशन योजना के अंतर्गत उद्यानिकी विभाग के सहयोग ले ओ ह 0.48 हेक्टेयर मं ड्रिप सिंचाई अउ मल्चिंग तकनीक के संग गेंदा फूल के खेती सुरू करिस, जेकर से ओकर आय मं सुग्‍घर बढ़ोतरी होईस।
ओ ह उद्यानिकी विभाग के अधिकारी मन के मारगदरसन अउ तकनीकी सहायता ले वैज्ञानिक तरीका ले खेती करना सीखिस। आधुनिक तकनीक अपनाये ले ओकर उपज बाढ़ीस, खरचा मं काबू रहिस अउ फसल के गुन मं घलो सुधार आईस। ओ ह गोंदा फूल ल स्थानीय बाजार के संगे-संग रायपुर मं घलो बेंचिस, जेकर से ओ ला लगभग दू लाख रूपिया के सुध मुनाफा होए हे। श्री साहू बताथे के पहिली धान के खेती ले परिवार के खरचा पूरा करना कठिन रहिस, फेर अब फूल मन के खेती ह ओकर आर्थिक स्थिति मजबूत हो गए हे। ओकर सफलता ला देखके तीर-तखार के किसान मन घलो गोंदा फूल के व्यावसायिक खेती अपनाये बर प्रेरित होवत हें।
उद्यानिकी विभाग के अधिकारी मन के कहना हे के कम भुइयाँ मं जादा आय देवइया फूल मन के खेती किसान मन बर फायदेमन्द विकल्प बनत हे। ड्रिप सिंचाई अउ मल्चिंग जइसे आधुनिक तकनीक मन के उपयोग ले पानी के बचत के संग उपज अउ गुन दुनो मं बढ़ोतरी होवत हे। हेमचंद साहू के सफलता ए बात के सुघर प्रमाण हे के सरकारी योजना मन के लाभ, वैज्ञानिक खेती अउ सही समय मं तकनीकी मारगदरसन किसान मन के आय बढ़ाये मं सुग्‍घर भुमिका निभा सकथे।