कम लागत अऊ सबले कम मानव श्रम म जादा लाभ दे सकत हे गेंदा के खेती

मुंगेली, दिनों-दिन किसान मन के रूझान कम लागत अऊ सबले कम मानव श्रम म जादा लाभ देवइया खेती कोति बाढ़त हे। अइसन समय म गेंदा फूल के खेती सार्थक साबित हो सकत हे।
गेंदा फूल के खेती, पारम्परिक खेती के तुलना म किसान मन ल जादा लाभ दे सकत हे। गेंदा फूल न सिरिफ कम खरचा म अच्छा लाभ देथे, भलुक जमीन के उपजाऊ शक्ति ल बरकरार रखे म घलोक अहम भूमिका निभाथे। जेखर से किसान मन ल गेंदा फूल के दुहरा फायदा मिलथे। उद्यान विभाग के ग्रामीण उद्यान विस्तार अधिकारी (फ्लोरिकल्चर विशेषज्ञ) डॉ .पूजा पहारे ह बताइस के गेंदा फूल के खेती सर्दी, गर्मी अऊ बरसात के सीजन म करे जाथे। गेंदा फूल के खेती हर किसान कर सकत हे। कहूं किसान हाईब्रिड किसिम के बीज ल लगाथे त ओला करीब 30 ले 35 हजार रुपिया प्रति एकड़ खरचा आथे। कहूं किसान अपन खेत म गेंदा के खेती करत हे, त वो साल म तीन पइत फूल के पैदावार ले सकत हे। खांटी जानकार के मुताबिक गेंदा के जड़ ले एक कैमिकल निकलथे जेन ह माटी के उर्वरा शक्ति ल बढ़ाथे। सीजन म गेंदा के कीमत 70 रुपए प्रति किलो तक पहुंच जाथे। कहूं किसान आधा एकड़ म घलोक गेंदा के खेती करथे त एक हफ्ता म एक क्विंटल ले लेके डेढ़ किवंटल तक फूल प्राप्त कर सकत हे। गेंदा फूल के खेती ल किसान ओपन अऊ पॉली हाउस दुनों जगा म ले सकत हे। गेंदा फूल कई वेरायटी म लगाए जा सकत हे। जेखर अच्छा भाव किसान मन ल मार्केट म मिल जाथे।