अस्पताल अपन संसाधन मन के बने ढंगलगहा उपयोग करके मरीज के करैं इलाज: मुख्यमंत्री दाउ भूपेश बघेल

रइपुर 1 मई 2021 शनिच्चर । मुख्यमंत्री दाउ भूपेश बघेल आज राजधानी स्थित अपन घरू कार्यालय म वीडियो कॉन्फ्रेंसिंग ले राज्य म कोरोना महामारी ले बचाव अउ नियंत्रण के संबंध म चिकित्सा विशेषज्ञ मन ले चर्चा करत महत्वपूर्ण सुझाव लीन। उन मन स्वास्थ्य अउ चिकित्सा ले जुड़े जम्मो लोगन मन ल कोरोना महामारी के लड़ई म महत्वपूर्ण फ्रंटलाइन वर्कर बताइन । येमा शासकीय अस्पताल के संगे-संग निजी चिकित्सा संस्थान मन ले शासन ल मिलत सहयोग बर तको भरपूर सहराइन। ये बेरा म स्वास्थ्य मंत्री श्री टी.एस. सिंहदेव अउ अपर मुख्य सचिव श्री सुब्रत साहू, अपर मुख्य सचिव श्रीमती रेणु जी. पिल्ले, मुख्यमंत्री के सचिव श्री सिद्धार्थ कोमल सिंह परदेशी अउ संचालक स्वास्थ्य अउ परिवार कल्याण श्री नीरज बंसोड संघरे रिहिन।
उन मन कहीन कि दुनिया भर कोविड-19 ले जूझत हे । अइसन संकट के घड़ी म मानवता के जम्मो आसरा हमर स्वास्थ्य अउ चिकित्सा ले जुड़े लोगन मन उपर टिके हे । एमा निजी अस्पताल मन के निजी डॉक्टर मन के सेवा तको अबड़ सहराए के लइक हे। इन्कर कोति ले अस्पताल मन म सीमित उपकरण अउ संसाधन के रहिते कोरोना के ये लड़ई ल सरलग लड़त हावय ।
मुख्यमंत्री दाउ बघेल ह विशेषज्ञ चिकित्सक मन ले अपन-अपन संस्थान म उपलब्ध संसाधन मन के बने ले बने उपयोग करके मरीज मन ल सुगमता ले इलाज सुविधा के लाभ देवाए बर कहीन । एकर बर आवश्यक चिकित्सा उपकरण मन ल बढ़ाए के संग ऑक्सीजन प्लाण्ट आदि सुविधा मन बर तको आवश्यक पहल करे के संबंध म जोर दीन । उन मन चिकित्सा संस्थान मन के मांग म उहां आवश्यक चिकित्सकीय सुविधा मन म बढ़ोत्तरी सहित प्रशिक्षित स्टाफ के बेवस्था आदि के संबंध म शासन कोति ले हर संभव सहयोग के आश्वासन दीन ।