मुख्यमंत्री ह शहीद एएसपी श्री आकाश राव गिरपुंजे ल दीन श्रद्धांजलि: पार्थिव शरीर ल खांधा देके दीन आखरी विदई

रायपुर, मुख्यमंत्री श्री विष्णुदेव साय ह आज सुकमा जिला के कोंटा म नक्सली मन कोति ले करे गए कायरतापूर्ण आईईडी विस्फोट म शहीद होए एएसपी श्री आकाश राव गिरपुंजे ल भावभीनी श्रद्धांजलि अर्पित करिन अऊ ओ मन ल आखरी विदाई दीन। मुख्यमंत्री श्री साय ह माना स्थित चौथी वाहिनी छत्तीसगढ़ सशस्त्र बल परिसर पहुंचके शहीद के पार्थिव शरीर म पुष्पचक्र अर्पित करके ओ मन ल नमन करिन अउ शहीद के पार्थिव शरीर ल खांधा देके सम्मानपूर्वक विदाई दीन।
मुख्यमंत्री श्री साय ह शहीद श्री गिरपुंजे के शोक-संतप्त परिजन मन ले मुलाकात करके अपन गहिर संवेदना प्रकट करिन अऊ ओ मन ल ए कठिन समय म ढांढस बंधाइन। मुख्यमंत्री ह कहिन के शहीद एएसपी श्री आकाश राव गिरपुंजे ह अपन कर्तव्य के प्रति अदम्य साहस, निष्ठा अऊ समर्पण के परिचय देवत सर्वोच्च बलिदान देहे हें। हमला उंखर उपर गर्व हे। सरकार ए दुःख के घड़ी म ऊंखर परिवार के संग खांधा ले खांधा मिलाके खड़े हे।
मुख्यमंत्री श्री साय ह कहिन के सरलग होवत सुरक्षाबल मन के सफल कार्रवाइ मन ले नक्सली बौखला गए हे। छत्तीसगढ़ सरकार ए चुनौती ले निपटे बर बाना उंचाए हे। उमन कहिन के शहीद श्री गिरपुंजे के वीरता अऊ देशभक्ति ल हमेसा सुरता करे जाही।
मुख्यमंत्री के संग ए बेरा म विधानसभा अध्यक्ष डॉ. रमन सिंह, उप मुख्यमंत्री श्री विजय शर्मा, उप मुख्यमंत्री श्री अरुण साव, वन मंत्री श्री केदार कश्यप, महिला अउर बाल विकास मंत्री श्रीमती लक्ष्मी राजवाड़े, विधायक श्री पुरन्दर मिश्रा, अपर मुख्य सचिव गृह विभाग श्री मनोज कुमार पिंगुआ, पुलिस महानिदेशक श्री अरुण देव गौतम, मुख्यमंत्री के प्रमुख सचिव श्री सुबोध कुमार सिंह, शहीद के परिजन, जनप्रतिनिधि अऊ बड़ संख्या म आम नागरिक उपस्थित रहिन।