रायपुर, मुख्यमंत्री श्री भूपेश बघेल कोति ले दीपावली के पावन पर्व के अवसर म शहीद मन के परिजन मन ल प्रेषित शुभकामना संदेश अऊ उपहार संबंधित जिला के पुलिस अधिकारी मन के माध्यम ले उंकर तक पहुंचे लगे हे। धरतेरस के मौका म मुख्यमंत्री के शुभकामना पत्र अऊ दीपावली के उपहार भेंट करे बर पुलिस महानिरीक्षक बस्तर रेंज श्री सुन्दरराज पी. अऊ पुलिस अधीक्षक श्री जितेन्द्र सिंह मीणा शहीद आरक्षक श्री महिपाल सिंह अऊ शहीद सहायक उप निरीक्षक श्री शोभाराम साहू के घर पहुंचिन। उमन शहीद मन के परिजन मन ले मुलाकात करके उंखर कुशलक्षेम जानिन अऊ मुख्यमंत्री के तरफ ले दीपावली के शुभकामना पत्र अऊ उपहार सौंपत सबो ल धनतेरस अऊ दीपावली के हार्दिक बधाई अऊ शुभकामना दीन। जानबा हे कि गृह मंत्री श्री ताम्रध्वज साहू अऊ पुलिस महानिदेशक श्री अशोक जुनेजा ह घलोक शहीद के परिजन मन ल दीपावली के हार्दिक शुभकामना अऊ बधाई देवत सबो शहीद के परिजन मन ल व्यक्तिगत संदेश पत्र प्रेषित करे हें। मुख्यमंत्री ह अपन शुभकामना संदेश म कहे हें कि शहीद मन के बलिदान ल सदा सुरता करे जाही। मुख्यमंत्री कोति ले शहीद मन के परिजन मन बर प्रेषित दिवाली के शुभकामना पत्र अऊ उपहार संबंधित जिला मन के पुलिस अधिकारी मन कोति ले सबो शहीद के परिजन मन के घर पहुंचा के देहे जात हे।
शहीद मन के परिजन तक पहुंचिस मुख्यमंत्री के देवारी शुभकामना पत्र अऊ भेंट
