राजमिस्त्री प्रशिक्षण ले युवा मन ल आत्मनिर्भर बनाए के पहल

जशपुर, ग्रामीण युवा मन ल स्वरोजगार ले जोड़के आत्मनिर्भर बनाए के दिशा म जिला प्रशासन जशपुर कोति ले सरलग उदीम करे जात हे। इही कड़ी म कलेक्टर श्री रोहित व्यास के मार्गदर्शन म राजमिस्त्री प्रशिक्षण कार्यक्रम चालू करे गए हे। ए विशेष पहल के तहत मनोरा विकासखंड के ग्राम खम्हली अऊ पत्थलगांव विकासखंड के ग्राम महेशपुर म 35-35 युवा मन ल 30 दिन के राजमिस्त्री प्रशिक्षण 19 अगस्त ले एसबीआई आरसेटी के माध्यम ले देहे जात हे।
मुख्य कार्यपालन अधिकारी, जिला पंचायत श्री अभिषेक कुमार ह बताइस के ये प्रशिक्षण ग्रामीण युवा मन ल आत्मनिर्भर बनाए के संगे-संग स्थानीय स्तर म रोजगार उपलब्ध कराए के दिशा म एक महत्वपूर्ण पहल हे। ए प्रशिक्षण के अंतर्गत युवा मन ल भवन निर्माण के आधुनिक तकनीक, नींव के तैयारी, प्लास्टर, लेवलिंग, पइत बैंडिंग अऊ कंक्रीटीकरण संबंधी जानकारी अऊ व्यावहारिक प्रशिक्षण देहे जात हे।
जानबा हे के जिला म प्रधानमंत्री आवास योजना (ग्रामीण) अंतर्गत बड़ संख्या म आवास स्वीकृत करे गए हे। प्रशिक्षण के बाद प्रशिक्षित ग्रामीण अपन-अपन ग्राम म प्रधानमंत्री आवास के निर्माण काम म सहयोग कर सकहीं। एखर से निर्माण काम के गुणवत्ता अऊ गति म सुधार होही संगेच ओ मन ल राजमिस्त्री के रूप म रोजगार अऊ बेहतर आय के संग ग्रामीण आवास मन के लउहे निर्माण म मदद मिलही। ये पहल युवा मन बर स्वरोजगार के नवा दुवारी खोलत हे। प्रशिक्षण के बाद ओ मन श्रमिक ले कुशल राजमिस्त्री बन जाही। एखर से ग्रामीण क्षेत्र मन म कुशल राजमिस्त्रि के उपलब्धता बाढ़ही अऊ ओ मन ल सम्मानजनक मानदेय मिलही।