- कोनो स्कूल शिक्षकविहीन नइ होना चाही: वाणिज्यिक कर मंत्री श्री लखमा
- बिजली आपूर्ति अऊ स्वास्थ्य व्यवस्था ल दुरूस्त करे के निर्देश
- किसान मन बर समय म खाद-बीज के व्यवस्था करव
- वाणिज्यिक कर मंत्री ह लीन जिला अधिकारी मन के बैठक
रायपुर, वाणिज्यिक कर अउ वाणिज्य अउ उद्योग मंत्री श्री कवासी लखमा ह कहिन हे कि बस्तर म शिक्षा सबले महत्वपूर्ण हे ए खातिर कोनो स्कूल शिक्षक विहीन नइ होना चाही। श्री लखमा ह आज जगदलपुर के कलेक्टोरेट म सबो विभाग मन के जिला अधिकारी मन के बैठक लेके संचालित योजना मन अऊ काम मन के समीक्षा करिन। बैठक म बताइए गीस कि जिला म 59 स्कूल शिक्षक विहीन अऊ 61 स्कूल मन म एकल शिक्षक हे। ओ मन ल ये घलोक बताइए गीस कि जिला म 494 शिक्षक दूसर कार्यालय मन या आन काम मन बर संलग्न हे। ए म श्री लखमा ह कहिन कि ए संलग्न शिक्षक मन के संलग्नीकरण तुरंते खतम करके ओ मन ल ऊंखर असली पदस्थापना म पदस्थ करे जाए। बैठक म बस्तर विकास प्राधिकरण के अध्यक्ष श्री लखेश्वर बघेल, विधायक श्री रेखचंद जैन अऊ विधायक नारायणपुर श्री चंदन कश्यप घलोक विशेष रूप ले उपस्थित रहिन। कलेक्टर डॉ. अय्याज तम्बोली ह जिला म चलत कई ठन योजना मन के प्रगति के जानकारी दीन।
वाणिज्यिक कर मंत्री श्री लखमा ह ग्रामीण क्षेत्र मन म बिजली आपूर्ति बाधित होए के शिकायत मन म नाराजगी व्यक्त करिन। उमन कहिन कि बिजली लाईन मन ल दुरूस्त करे जाए। ये शिकायत दुबारा नइ आना चाही। उमन कहिन कि जिला म स्वास्थ्य व्यवस्था ल घलोक दुरूस्त करे के जरूरत हे। मरीज मन ल ईलाज या दवई मन बर परेशानी नइ होना चाही। उमन संयुक्त संचालक स्वास्थ्य ल कहिन कि मरीज मन के प्रति डॉक्टर मन अऊ पैरामेडिकल स्टॉफ के व्यवहार शालीन होना चाही। पूरा संवेदनशीलता ले मरीज मन के उपचार करे जाए। विधायक नारायणपुर श्री चंदन कश्यप ह भानपुरी सामुदायिक स्वास्थ्य केन्द्र म डॉक्टर मन के कमी के बात आघू आए म मंत्री श्री लखमा ह उहां दू अऊ डॉक्टर मन ल पदस्थ करे के निर्देश कलेक्टर ल दीन। कलेक्टर ह बताइस कि एक हफ्ता के भीतर दू डॉक्टर मन के तैनाती कर दे जाही। विधायक श्री रेखचंद जैन ह जगदलपुर के महारानी अस्पताल म मरीज मन बर दवई नइ होए के मामला उठाए गीस। ए म कलेक्टर ह वार्ड म ही दवई मन के व्यवस्था करे के निर्देश संयुक्त संचालक स्वास्थ्य ल दीन। बैठक म अपर कलेक्टर श्री अरबिंद एक्का संग सबो विभाग मन के जिला अधिकारी उपस्थित रहिन।
