भक्ति के क्षेत्र म माता कर्मा अऊ माता शबरी हमार प्रदेश के विभूति: मुख्यमंत्री श्री बघेल

रायपुर, छत्तीसगढ़ म माता कर्मा अऊ माता शबरी के भक्ति अतुलनीय रहे हे। छत्तीसगढ़ म जब भक्त माता मन के परंपरा ध्यान म आथे त माता कर्मा अऊ माता शबरी के ध्यान सबले पहिली आथे। माता शबरी ह शिवरीनारायण म जइसे भगवान श्री राम ल जूठा बोईर खवाईस। वइसनहे माता कर्मा ह भगवान श्री कृष्ण ल प्रेम से खिचरी खवाईस। ए प्रकार ले भक्त माता मन ह अपन प्रेम ले ईश्वर ल घलोक अभिभूत कर लीन। ऊंखर स्नेह के वश भगवान श्री राम अऊ भगवान श्री कृष्ण ऊंखर पास आइन।
मुख्यमंत्री श्री भूपेश बघेल दुर्ग जिला के पाटन विकासखण्ड के ग्राम तेलीगुण्डरा म आयोजित तहसील स्तरीय कर्मा जयंती समारोह ल सम्बोधित करत रहिन। उमन ये मौका म कुष्ठ जागरूकता स्थल म महात्मा गांधी के प्रतिमा के अनावरण घलोक करिन। एखर संगेच उमन स्वर्गीय श्री दाऊ रामचंद्र साहू के प्रतिमा म माल्यार्पण करके श्रद्धासुमन घलोक अर्पित करिन। उमन कार्यक्रम म आदर्श विवाह करइया नवदम्पति मन ल आशीर्वाद घलोक दीन।