Live Video: मुख्यमंत्री श्री भूपेश बघेल संघरिन तीन दिन के माता कौशल्या महोत्सव के समापन म

रायपुर, मुख्यमंत्री श्री भूपेश बघेल ह भगवान श्रीराम के ननिहाल अऊ माता कौशल्या के नगरी चंदखुरी म तीन दिन के माता कौशल्या महोत्सव के समापन कार्यक्रम म संघरिन। माता कौशल्या महोत्सव ल महिला सशक्तिकरण के थीम उपर मनाए गीस। आस्था अऊ भक्ति ले ओतप्रोत ये महोत्सव म छत्तीसगढ़ संग देश के ख्याति प्राप्त कलाकार मन सांस्कृतिक कार्यक्रम के मंचन घलोक करिन।

जानबा  हे कि मुख्यमंत्री श्री भूपेश बघेल ह माता कौशल्या के जन्मभूमि चंदखुरी के वैभव ल विश्व पटल म स्थापित करे, प्रदेश के कला, संस्कृति अउर पर्यटन ल बढ़ावा देहे, महिला सशक्तिकरण, कार्यशील कलाकार मन के संरक्षण, संवर्धन अउ कला दल मन के सरलग विकास बर ये साल गणतंत्र दिवस के अवसर म माता कौशल्या महोत्सव मनाए के घोषणा करे रहिन।

पर्यटन कैफे के होइस उद्घाटन
मुख्यमंत्री श्री भूपेश बघेल ह माता कौशल्या महोत्सव के समापन अवसर म मंदिर परिसर म स्थित पर्यटन विभाग कोति ले तियार टूरिज्म कैफे के घलोक उद्घाटन करिन। पयर्टन कैफे शुरू होए ले अब इहां अवईया श्रद्धालु अउ पर्यटक मन ल छत्तीसगढ़ी व्यंजन संग मिलेट्स ले तियार करे गए खाद्य उत्पाद तको मिलही। ये कैफे के शुरू होए ले श्रद्धालु मन ल छत्तीसगढ़ी कलेवा मन के सुवाद लेहे के मौका मिलही अऊ पर्यटक मन घलोक छत्तीसगढ़ी कलेवा ल चिख सकही।

महिला स्व-सहायता समूह के स्टॉल मन म दिखिस छत्तीसगढ़ी संस्कृति के झलक
मुख्यमंत्री श्री भूपेश बघेल के बताए रद्दा म रेंगत महिला मन ल सशक्त बनाए के उद्देश्य ले राज्य सरकार सरलग काम कर करत हे। मेला, उत्सव अउ आन प्रदर्शनी आदि कार्यक्रम मन के अवसर म महिला स्व-सहायता समूह मन के समान मन लबेंचे बर जगा देहे जात हे  अउर उंकर प्रचार-प्रसार करे जात हे। माता कौशल्या महोत्सव के मौका म घलोक महिला स्व-सहायता कोति ले उत्पादित समान मन ल बेंचे बर विशेष तौर म नौ स्टॉल तियार करे गए रहिस। महिला मन कोति ले संचालित ए स्टाल मन म छत्तीसगढ़ी संस्कृति के झलक देखे ल मिलीस।