खूबसूरत लाइट अऊ फायर शो के बीच भगवान श्रीराम के 51 फीट ऊंचा भव्य प्रतिमा के घलोक लोकार्पण
रायपुर, मुख्यमंत्री श्री भूपेश बघेल ह आज राजधानी रायपुर के नजदीक चंदखुरी म राम वन गमन पर्यटन परिपथ के अंतर्गत अधोसंरचना विकास, माता कौशल्या मंदिर परिसर के जीर्णोंद्धार अऊ सौंदर्यीकरण काम मन के लोकार्पण करिन। उमन खूबसूरत लाइट अऊ फायर शो के बीच परिसर के प्रवेश-द्वार म बने भगवान श्रीराम के 51 फीट ऊंचा भव्य प्रतिमा के घलोक लोकार्पण करिन। मुख्यमंत्री ह चंदखुरी के जलसेन तालाब के बीच म स्थित प्राचीन कौशल्या मंदिर म माता कौशल्या अऊ उहां बालरूप म उंखर गोद म विराजित श्रीराम के पूजा-अर्चना करके प्रदेशवासी मन के सुख-समृद्धि के कामना करिन।
पर्यटन मंत्री श्री ताम्रध्वज साहू, वन मंत्री श्री मोहम्मद अकबर, स्कूल शिक्षा मंत्री डॉ. प्रेमसाय सिंह टेकाम, नगरीय प्रशासन अऊ विकास मंत्री डॉ. शिवकुमार डहरिया, महिला अऊ बाल विकास मंत्री श्रीमती अनिला भेड़िया, संस्कृति मंत्री श्री अमरजीत भगत, आबकारी मंत्री श्री कवासी लखमा, राज्यसभा सांसद श्रीमती छइंहा वर्मा अऊ गौ सेवा आयोग के अध्यक्ष महंत श्री राम सुंदर दास संग बहुत अकन संसदीय सचिव, विधायक अऊ स्थानीय जनप्रतिनिधि घलोक मंदिर परिसर म लोकार्पण कार्यक्रम म मौजूद रहिन।
