- मर्यादा पुरूषोत्तम श्री रामचंद्र जी के पूजा-अर्चना करके प्रदेशवासी मन के सुख-समृद्धि के कामना करिन
- चंदखुरी म होही भव्य मंदिर के निर्माण
- प्रभु श्रीराम के पद चिन्ह म चलके जनहित म काम करत हे राज्य सरकार
रायपुर, 05 अगस्त 2020। नगरीय प्रशासन अऊ श्रम मंत्री डॉ. शिव कुमार डहरिया ह रायपुर जिला के विकासखण्ड आरंग अंतर्गत ग्राम चंदखुरी म प्रभु श्री राम के माता कौशल्या के मंदिर म माथा टेकिन अऊ पूजा-अर्चना करके प्रदेशवासी मन के सुख-समृद्धि के कामना करिन। उमन ये बेरा म चंदखुरी म स्थित बजरंग बली मंदिर म श्री राम भक्त हनुमान के घलोक आराधना करिन। उमन कहिन के मुख्यमंत्री श्री भूपेश बघेल के नेतृत्व म माता कौशल्या के जन्म स्थली चंदखुरी म भव्य मंदिर के निर्माण होही। उमन बताइन के भगवान श्री राम वनवास के समय छत्तीसगढ़ के जेन-जेन जगा ले पद यात्रा करे हें, उंकर सुरता ल सहेजे बर वो जगा मन के चिन्हारी करके राम-वन-गमन-पथ के रूप म विकसित करे जाही।
डॉ. डहरिया ह कहिन के राज्य सरकार मर्यादा पुरूषोत्तम श्री रामचंद्र के पद चिन्ह म चलके ही जनहित म काम करत हे। उमन कहिन के प्रभु श्री रामचंद्र जी ह अपन वनवास काल के बहुत अकन बेरा छत्तीसगढ़ म व्यतीत करे हें। वो जगा मन ल पर्यटन स्थल के रूप म घलोक विकसित करे के योजना हे। पहिली चरण म 09 जगा के चयन करे गए हे। वो जगा मन म सीतामढ़ी-हरचौका (कोरिया), रामगढ़ (अम्बिकापुर), शिवरीनारायण (जांजगीर-चांपा), तुरतुरिया (बलौदाबाजार), चंदखुरी (रायपुर), राजिम (गरियाबंद), सिहावा-सप्तऋषि आश्रम (धमतरी), जगदलपुर (बस्तर), रामाराम (सुकमा) सामिल हे। प्रस्तावित 09 जगाा ल लेत पर्यटन विभाग कोति ले एक कॉन्सेप्ट प्लान तियार करे गए हे, जेकर लागत 137.45 करोड़ रूपिया हे।
मंत्री डॉ. डहरिया ह कहिन के छत्तीसगढ़ भगवान श्रीराम के ननिहाल हे। इहां कण-कण म भगवान राम रचे-बसे हें। चंदखुरी म स्थित माता कौशल्या के मंदिर दुनिया म एकमात्र मंदिर हे, ये मंदिर के भव्य निर्माण होए ले निश्चित ही राष्ट्रीय अउ अंतर्राष्ट्रीय स्तर म पहिचान बनही। ये बेरा म मंदिर समिति के अध्यक्ष श्री देवेन्द्र वर्मा, जनपद सदस्य श्री दिनेश ठाकुर, श्रीमती नेहा वर्मा, श्रीमती रानी ढीवर संग समाज सेवी श्री आनंद गिलहरे, श्री राजेन्द्र महेश्वरी अऊ आसपास के पंचायत प्रतिनिधि उपस्थित रहिन।