कांकेर 19 दिसम्बर 2023/ विकसित भारत संकल्प यात्रा के तहत जिला के कई ठन गांव मन के मनखे मन ल केन्द्र सरकार के कई ठन योजना मन के जानकारी देहे जात हे अऊ ओ मन ल लाभान्वित घलोक करे जात हे। एखर तहत कई योजना के हितग्राही ‘मेरी कहानी-मेरी जुबानी’ गतिविधि के माध्यम ले अपन अनुभव साझा करत हें अऊ आन मनखे मन ल घलोक योजना मन के लाभ उठाए बर प्रेरित करे जात हे। ‘मेरी कहानी-मेरी जुबानी’ के अंतर्गत प्रधानमंत्री मातृ वंदना योजना के हितग्राही ग्राम हाटकर्रा निवासी अरूणा पटेल ह बताइस कि जब वो पहली पइत गर्भवती होइस त वो ह अपन गांव के आंगनबाड़ी केन्द्र म जाके पंजीयन कराइस। उहां ओ ल सुपरवाइजर अउ आंगनबाड़ी कार्यकर्ता के माध्यम ले प्रधानमंत्री मातृ वंदना योजना के बारे म जानकारी मिलीस अऊ योजना के लाभ उठाए बर वो ह फॉर्म भरिस।
एखर बाद आंगनबाड़ी केन्द्र ले हर हफ्ता ओ ल रेडी-टू-ईट मिलना शुरू होइस। एखर अलावा ओ ल अंडा, रागी, कोदो संग गरम अउ ताजा पोषक आहार घलोक मिलेेल चालू हो गे। उहें ओखर नियमित स्वास्थ्य परीक्षण के संग सबो जरूरी टीका घलोक समय म लगाए गीस। अइसनहे ये योजना ले वोला सरलग पोषक आहार मिले के संग स्वास्थ्य के बेहतर देखभाल घलोक होए लगिस, जेखर फलस्वरूप वो ह स्वस्थ लइका ल जनम दीस। पटेल ह बताइस कि प्रसव होए के बाद वोखर खाता म पांच हजार रुपए के राशि घलोक जमा हो गीस। वो ह ये राशि के उपयोग दवाई अऊ लइका के सेहत बर उपयोग करिस। पटेल ह बताइस कि गर्भवती होए के बाद स्वास्थ्य जांच अउर प्रसव तक ये योजना के माध्यम ले ओ ल बहुत राहत मिलीस अऊ आर्थिक रूप ले घलोक मदद मिलीस। वो ह ये योजना बर प्रधानमंत्री नरेन्द्र मोदी के प्रति आभार प्रकट करत धन्यवाद दीस।