काली मौसम  म बदलाव होए के संभावना हे, अंधड़ चले के अलर्ट

रायपुर,  05 मई 2024। छत्तीसगढ़ म अवइया 48 घंटा म तापमान म 1 ले 2 डिग्री बढ़े के संभावना हे। मौसम विभाग के मुताबिक आज रायपुर समेत आन शहर मन म गरमी के अऊ बढ़े के आसार हे। मौसम विभाग कोति  जारी रिपोट के मुताबिक इतवार के राजधानी म तापमान 43 डिग्री पार होए के संभावना हे। 6 मई मने सोमवार के रायपुर, बस्तर, बिलासपुर अऊ सरगुजा संभाग के कुछ जिला मन म अंधड़ चले के संग हल्का बूंदाबांदी के संभावना हे। सनिच्‍चर के प्रदेश म सबले जादा तापमान 45.1 डिग्री तिल्दा म दर्ज करे गीस। सबले कम तापमान 16.4 डिग्री बलरामपुर म रहिस। प्रदेश के 10 जिला मन के तापमान 41 डिग्री ले ऊपर हे। नवा सिसटम बने के सेती रायपुर, बस्तर अऊ सरगुजा संभाग के कुछ इलाका मन म 6 अऊ 7 मई के गरज-चमक अऊ अंधड़ के संग बूंदाबांदी हो सकत हे। एखर से तापमान म कमी आही, फेर सिसटम के असर जादा समय तक नइ रहय। मौसम वैज्ञानिक मन के अनुमान हे कि बादल छंटतेच तापमान 4 ले 5 डिग्री तक बढ़ सकत हे।