स्वदेश दर्शन योजना 2.0 के तहत जशपुर ला मिलिस पर्यटन विकास के बड़का सौगात
होम-स्टे, रिसोर्ट, पाथवे, लैंडस्केपिंग समेत आधुनिक पर्यटक सुविधा मन का होही विकास
रायपुर, मुख्यमंत्री श्री विष्णु देव साय ह आज भारत सरकार के स्वदेश दर्शन योजना 2.0 के तहत मंजूर ‘मयाली-बगीचा विकास परियोजना’ के मयाली नेचर कैंप म विधिवत भूमिपूजन करिन। लगभग 10 करोड़ रूपिया के लागत ले बनइया ए परियोजना के तहत मयाली, दुनिया भर म प्रसिद्ध मधेश्वर पर्वत (दुनिया के सबले बड़े प्राकृतिक शिवलिंग) अउ बगीचा म स्थित कैलाश गुफा क्षेत्र म अलग-अलग पर्यटन सुविधा मन के विकास करे जाही।
ए परियोजना ह ए क्षेत्र के प्राकृतिक, सांस्कृतिक अउ जनजातीय विरासत ला बचाय के संगे-संग समाज आधारित पर्यटन ला घलो मजबूत बनाही। एकर ले स्थानीय युवा मन बर रोजगार के नवा मौका मिलही अउ जशपुर जिला ला एक बड़का पर्यटन केंद्र के रूप म नवा पहिचान मिलही।
ए मऊका म मुख्यमंत्री श्री साय ह क्षेत्र के मनखे मन ला बधाई देवत कहिन के मयाली-बगीचा विकास परियोजना जशपुर जिला के पर्यटन विकास बर एक ऐतिहासिक कदम हे। आज मयाली के विकास के मजबूत नेव रखे गे हे। मयाली अब पर्यटन के नक्सा म तेजी ले ऊपर आवत हे अउ आए वाले बखत म ए ह एक वैश्विक पर्यटन केंद्र के रूप म विकसित होही।
मुख्यमंत्री ह कहिन के मयाली के पहिचान जुग-जुग ले मधेश्वर महादेव ले जुड़े हे, जेला दुनिया के सबले बड़े प्राकृतिक शिवलिंग माने जाथे। ए विकास परियोजना के माध्यम ले मधेश्वर पर्वत के धार्मिक अउ पर्यटन महत्व ला देस-बिदेस म पहिचान मिलही। योजना के तहत मयाली डेम के तिर म पर्यटक रिसोर्ट अउ स्किल डेवलपमेंट सेंटर बनाए जाही।
ओ मन कहिन के मयाली ला एक इको-टूरिज्म अउ एडवेंचर डेस्टिनेशन के रूप म संवारे जाही। इहां के जंगल, झरना, पहाड़ अउ समृद्ध आदिवासी संस्कृति ला दुनिया भर के पर्यटक मन तक पहुँचाए जाही। पर्यटन ले होय वाला कमाई के सीधा फायदा इहां के मनखे मन ला मिलही। श्री साय ह कहिन के एही लकस ले राज्य सरकार ह ‘होम-स्टे’ नीति लागू करे हे, जेकर ले गाँव के परिवार मन पर्यटन ले जुड़के पइसा कमा सकहीं अउ पर्यटक मन ला घलो इहां के संस्कृति ला नजदीक ले जाय के मौका मिलही।
मुख्यमंत्री ह कहिन के ए परियोजना ह इहां के जुआ मन बर नवा अवसर लेके आई हे। स्किल डेवलपमेंट सेंटर म टूर गाइड, होटल सेवा, एडवेंचर स्पोर्ट्स, हस्तशिल्प अउ डिजिटल बुकिंग के ट्रेनिंग दे जाही।
विकास के काम ले बदलही मयाली के तस्वीर, उभरही नवा पर्यटन केंद्र
मयाली क्षेत्र ला प्राकृतिक, धार्मिक अउ ग्रामीण पर्यटन के एक बड़े केंद्र बनाए जाही। योजना के तहत 5 ठन पर्यटक कॉटेज, कॉन्फ्रेंस हॉल, स्किल डेवलपमेंट सेंटर, भव्य दुआर (प्रवेश द्वार), बाउंड्री वॉल, आधुनिक टॉयलेट सुविधा, लैंडस्केपिंग अउ पाथवे (रद्दा) के निर्माण करे जाही। ए सुविधा मन ले पर्यटक मन के ठहरे अउ कार्यक्रम मन बर बढ़िया व्यवस्था होही।
धार्मिक पर्यटन ला मजबूत करे बर शिव मंदिर क्षेत्र म सुग्घर दुआर, टॉयलेट, लैंडस्केपिंग अउ रद्दा बनाए जाही। ओही कोति बगीचा के कैलाश गुफा म पिकनिक स्पॉट, सुस्ताय बर शेड, घाट विकास अउ सीढ़ी-रेलिंग के मरम्मत करे जाही, जेकर ले पर्यटक मन ला सुरक्षा अउ सुविधा मिलही। ए जम्मों काम भारत सरकार के पर्यटन मंत्रालय कोति ले स्वदेश दर्शन योजना 2.0 के तहत करे जाही। योजना पूरा होय ले इहां बऊपार बढ़ही, स्थानीय अर्थव्यवस्था मजबूत होही अउ क्षेत्र के संस्कृति ला राष्ट्रीय स्तर म नवा पहिचान मिलही।
ए मऊका म मुख्यमंत्री श्री साय के धर्मपत्नी श्रीमती कौशल्या साय, पत्थलगाँव विधायक श्रीमती गोमती साय, टूरिज्म बोर्ड के अध्यक्ष श्री नीलू शर्मा अउ भारी संख्या म ग्रामीण मन उपस्थित रहिन।
