- आर्थिक, समाजिक, शैक्षिणिक रूप ले पिछड़े क्षेत्र मन के समुचित विकास करना छत्तीसगढ़ सरकार के मुख्य ध्येय-श्री अकबर
रायपुर, वन मंत्री मोहम्मद अकबर ह आज बुधवार के कबीरधाम जिला के अपन विधानसभा क्षेत्र के सहसपुर लोहारा नगर पंचायत के आम जनता ल करोड़ो रूपिया के विकास काम मन के सौगात दीन। उमन क्षेत्र के जनता के मांग के मुताबिक 1 करोड़ 23 लाख 59 हजार रूपिया के 6 अलग-अलग विकास मूलक काम मन के भूमिपूजन करिन। संगेच उमन यादव समाज, निषाद समाज अऊ नगर वासी मन के मांग मन ल पूरा करत सहसपुर लोहारा म शीतला मंदिर के तीर भवन निर्माण के आधारशिला घलोक रखिन।
मोहम्मद अकबर ह कहिन कि आर्थिक, समाजिक, शैक्षिणिक रूप ले पिछड़े मनखे मन के जीवन उत्थान अऊ पिछड़े क्षेत्र मन के समुचित विकास करना छत्तीसगढ़ सरकार के मुख्य ध्येय हे। राज्य सरकार ह जनता ले जेन वादा करे रहिस, ओ मन ल प्राथमिकता ले पूरा करत हे। मुख्यमंत्री श्री भूपेश बघेल के सियानी म जनहित ले जुड़े मांग अऊ समस्या मन के प्राथमिकता ले निदान करके मनखे मन के जीवन स्तर म सुधार लाए जात हे। उमन कहिन कि उपेक्षित सहसपुर लोहारा नगर पंचायत म विकास कार्य मन के पहल ले एखर मुख्यधारा म जुड़के आगू बढ़े के नवा रद्दा खुलही।
