मुख्यमंत्री श्री साय ह लइका मन ले कहिन कि मेहनत अऊ लगन ले पढ़व अऊ अपन उज्ज्वल भविष्य गढ़व
रायपुर, 06 अगस्त 2024। मेगा पालक शिक्षक बैठक म सामिल होए पहुंचे मुख्यमंत्री श्री विष्णुदेव साय ल स्कूली लइका मन ह पोस्टर के माध्यम ले पालक शिक्षक मीटिंग के उद्देश्य अऊ गतिविधि मन के रूपरेखा अऊ एखर से छात्र मन ल होवइया लाभ के बारे म विस्तार ले बताइन। लइका मन के सर्वांगीण विकास बर शिक्षा विभाग ह 13 बिंदु पालक शिक्षक मीटिंग बर निरधारित करे हे, अलग अलग लइका मन ह ए बिंदु मन के बारे म बताइन। मुख्यमंत्री श्री विष्णुदेव साय ह सबो गतिविधि मन के बारे म जानकारी लीन अऊ लइका मन ले ए सबो के बने सहिन लाभ उठाए बर कहिन। उमन लइका मन ले ऊंखर करियर प्लान घलोक पूछीन अऊ खूब मेहनत करके अपन सपना ल पूरा करे के सीख दीन। उमन कहिन जीवन म श्रेष्ठता हासिल करे के एक मात्र माध्यम शिक्षा हे। आप मन करियर म जेन क्षेत्र म आगू बढ़ना चाहत हव ओखर बर लगन अऊ मेहनत ले पढ़व जेखर से आप मन अपन उज्ज्वल भविष्य गढ़ सकत हव। ए बेरा म मुख्यमंत्री के धर्मपत्नी श्रीमती कौशल्या साय अऊ स्कूल शिक्षा सचिव श्री सिद्धार्थ कोमल परदेशी घलोक संग म रहिन।
पालक शिक्षक गोठ म पालक मन ल लइका मन बर यथासंभव घर म पढ़ाई बर मेरा कोना-स्टडी कॉर्नर के रूप म एक निश्चित स्थान तय करे के बात बताए गीस। अइसनहे छात्र मन बर एक आदर्श दिनचर्या कइसे होवय एखर जानकारी दे गीस। लइका मन ह आज का सीखिन के तहत पालक मन के सहभागिता बढ़ाए के संग उंखर प्रोग्रेस मॉनिटर करे म सहायता मिलही। ‘‘बच्चा बोलेगा बेझिझक’’ ले लइका मन के अंदर स्टेज म बोले के भय ल दूर करना अऊ पब्लिक स्पीकिंग अऊ लीडरशिप क्वालिटी बढ़ाए म काम होही। लइका मन के अकादमिक प्रगति अउ परीक्षा उपर चर्चा के उद्देश्य पालक अऊ छात्र मन ल परीक्षा के समय होवइया तनाव ल दूर करना अऊ बने नम्बर लाय बर प्रोत्साहित करना हे। पुस्तक के उपलब्धता सुनिश्चित करना, बस्ता रहित सनिवार के अंतर्गत आन ज्ञानवर्धक गतिविधि मन ले छात्र मन ल जोड़ना, पढ़ईया लईका मन के आयु/कक्षा जइसे स्वास्थ्य परीक्षण अउ पोषण के जानकारी देना, न्योता भोज के माध्यम ले सामुदायिक भागीदारी ल प्रोत्साहित करना, कई ठन डिजिटल प्लेटफार्म के माध्यम ले शिक्षा बर पालक अउ छात्र मन ल अवगत कराना, कई ठन प्रतियोगी परीक्षा/छात्रवृत्ति अउ विभागीय योजना मन के जानकारी प्रदान करे के संग जाति/आय/निवास प्रमाण पत्र निर्माण अऊ नवा शिक्षा नीति के बारे म विस्तार ले जानकारी देहे गीस।