रायपुर, 20 जनवरी 2021। छत्तीसगढ़ म कोरोना वैक्सीनेशन के तीसर दिन आज डॉ. भीमराव अंबेडकर स्मृति चिकित्सालय के आई सी यू के प्रमुख डॉ. ओ पी सुंदरानी अऊ पल्मोनरी मेडिसिन के प्रमुख चिकित्सक डॉ. आर के पांडा ह आज कोरोना के वैक्सीन लगवाइस। दूनो चिकित्सक स्वस्थ हें अऊ टीका लगाय के बाद वापस अस्पताल म काम म आ गए हें। दूनो ह चिकित्सा कर्मि मन ले आग्रह करे हें के ओ मन अवश्य टीका लगवावंय काबर के ये पूरा सुरक्षित हे। आप मन टीका लगा के आम जनता के आगू मिसाल रखव।
छत्तीसगढ़ म कोरोना के दस्तक के संग दुनों डॉक्टर लगातार बिना रूके कोरोना मरीज मन के इलाज म मेकाहारा के आन चिकित्सक अऊ स्टाफ के संग जुटे रहे हें। एखर अलावा रिफरल केन्द्र होए के सेती प्रदेश के आन अस्पताल के चिकित्सक मन ल घलोक मार्गदर्शन देवत रहे हें। चिकित्सक मन ल आन लाइन प्रशिक्षण घलोक देहे हें । मरीज मन के सेवा करे अऊ ऊंखर ठीक होके घर जाय म उमन, मरीज मन के परिजन मन के बराबर ही खुशी होत रहे हें। डॉ. सुंदरानी ह कहिन के कोरोना काल के समय उमन कोनो अवकाश नइ लेहे हें। डॉ. पांडा ह कहिन के तिहार म घलोक ओ मन ड्यूटी करत रहिन ताकि मरीज स्वस्थ हो सकयं। एकरे से उमन ल अड़बड़ खुशी मिलथे।
खांटी जानकार के कहना हे के वैक्सीन लगाय के बाद घलोक सबो ल कोविड अनुकूल व्यवहार के पालन करना मास्क लगाना ,सुरक्षित दूरी रखना अऊ हाइजिन के ध्यान रखना होही अऊ ओ मन रखत घलोक हें। चिकित्सक मन के मनमताबिक वैक्सीन के दुसरा डोज के 14 दिन के बाद ही शरीर म प्रतिरक्षात्मक तंत्र विकसित होथे। विशेषज्ञ अभी घलोक एखर सेती कहत हें के संक्रमण कम होए के मतलब ये नइ हे के ये अऊ नइ फैल सकय। सबला सचेत रहे के जरूरत अभी तक हे, तभे कोरोना के संक्रमण ले बच सकत हें। प्रदेश म कोरोना वैक्सीनेशन मंगलवार, सुकरवार अऊ इतवार ल छोड़के बाकी सबो दिन बिहनिया 9 बजे ले संझा 5 बजे तक पूर्व निरधारित सेशन साइट म होही।
मेकाहारा के आई.सी.यू. के बड़े डाक्टर डॉ. सुंदरानी अऊ डॉ. पांडा ह घलोक लगवाईस कोरोना वैक्सीन, दुनों स्वस्थ
