मनरेगा ले बदलिस लोमेश साहू के जिनगी, पक्का कोठा बनिस तरक्की के सहारा

कबीरधाम, कहिथें के कहूं इरादा मजबूत रहय अऊ सही सरकारी योजना के संग मिल जाय त जिनगी के डहर ह आसान हो जाथे। कबीरधाम जिला के ग्राम पंचायत चरडोंगरी के रहवईया गौ-पालक श्री लोमेश साहू के कहिनी घलोक कुछ अइसने हे। मनरेगा योजना ह ओखर जिनगी मं बड़का बदलाव लानिस अऊ ओला आत्मनिर्भर बने मं मदद करिस।
लोमेश साहू के परिवार ह खेती-किसानी अऊ पशुपालन उपर निर्भर रहिस। ओखर तिर गाय-भइंस त रहिस, फेर ओ मन ल रखे बर पक्का शेड नइ रहिस। कच्ची कोठा मं बरसा के दिन मं चिखला अऊ गंदगी हो जात रहिस। गोबर अऊ गौमूत्र के सेती सफाई रखना मुस्किल हो जात रहिस, जेकर ले मवेशी मन बीमार परत रहिस अऊ दूध के पैदावार घलोक कम हो जात रहिस। आर्थिक तंगी के सेती पक्का कोठा बनवाना ओखर बर बहुते कठिन काम रहिस।
इही बीच मनरेगा योजना के तहत ओला 53 हजार रूपिया के लागत ले पक्का कोठा बनाए के मंजूरी मिलिस। कोठा बनत बखत ओला 36 दिन के रोजगार घलोक मिलिस अऊ मजूरी के पइसा ह सोझ ओखर बैंक खाता मं जमा होइस। ग्राम पंचायत के सहयोग ले मजबूत अऊ साफ-सुथरा कोठा बनके तैयार हो गे, जेकर ले ओखर सबले बड़का समस्या दूर हो गे।
पक्का कोठा बने के बाद ओखर मवेशी मन सुरक्षित अऊ स्वस्थ रहय बर लगिन, जेकर ले दूध के पैदावार मं घलोक बाढ बढ़ोतरी होइस। आज ओखर तिर 12 गाय अऊ 2 भंइस हें अऊ ओ हर दिन लगभग 50 ले 60 लीटर दूध निकालथे। एखर ले ओला हर महीना करीब 40 ले 45 हजार रूपिया के सुद्ध आय होय बर धर ले हे। संग मं, गोबर ले जैविक खाद बनाके ओ मन अपन खेती मं उपयोग करत हें, जेकर ले खेती के लागत घलोक कम हो गे हे।
लोमेश साहू कहिथें के मनरेगा ले मिले ये कोठा ह ओखर तरक्की के नेव साबित होय हे। अब मवेशी सुरक्षित हें, साफ-सफाई बने रहिथे अऊ आय घलोक बढ़ गे हे। ए योजना ह ओखर परिवार ल आत्मनिर्भर बना दे हे। आज ओ मन नइ केवल अपन परिवार के बढ़िया ढंग ले पालन-पोषण करत हें, बल्कि गाँव के आन किसान मन बर घलोक एक प्रेरणा बन गे हें।