मनरेगा खोलत हे किसान मन के आर्थिक समृद्धि के रद्दा : कुआं खोदई के बाद धान के संगेच अब गेहूं अऊ सब्जी के घलोक खेती

कोरिया, 5 फरवरी 2020। मनरेगा (महात्मा गांधी राष्ट्रीय ग्रामीण रोजगार गारंटी अधिनियम) मनखे मन ल रोजगार मुहैया कराए के संगेच सरलग उंखर आजीविका के संवर्धन घलोक करत हे। मनरेगा के संग निजी डबरी, तलाब अऊ कुंवा मन के निर्माण ले सिंचाई के व्यवस्था हो होवत हे तेखर से लघु अऊ सीमांत किसान मन के आर्थिक समृद्धि के रद्दा खुलत हे। अब ओ मन सिरिफ धान के खेती तक सीमित नइ हें। रबी फसल अऊ सब्जी के पैदावार के संगेच ये ह मछली पालन जइसे नवा रोजगार के विकल्प घलोक खोलत हे। डबरी, तलब अऊ कुंवा मन के निर्माण ले आजीविका संवर्धन के संगेच निस्तारी बर घलोक पानी मिलत हे।
मनरेगा ले खेत म बने कुंवा ह कोरिया जिला के वनांचल भरतपुर के ग्राम जमथान के किसान समयलाल अहिरवार के जिंदगी बदल देहे हे। कुआं खोदई के बाद ओ ह खेत ले लगे अपन बाड़ी म सब्जी उपजावत हे। संग म बाड़ी तीर अपन एक एकड़ जमीन ल रूंध के गेहूं के फसल घलोक लेवत हे। समयलाल के बताती पऊर साल वो ह तीन कुंटल गेंहू उपजाए रहिस। ये पपईत घलोक वो ह सब्जी के संग गेहूं के बोआई करे हे। चावल के संग रोटी अऊ सब्जी घलोक अब ओ ल अपन खेत म उपजा के खावत हे। अनाज अऊ सब्जी अब ओ ल बाहिर ले बिसाना नइ परत हे।
साढ़े तीन एकड़ जमीन के मालिक समयलाल बताथे कि पहिली सिंचाई अऊ पेयजल दुनों के गंभीर संकट रहिस। घर ले अबड़ दूरिहा पानी के एकमात्र साधन हैंडपंप रहिस। एखर से ओ ह पेयजल के व्यवस्था तो कर लेत रहिस, फेर निस्तारी बर परेशान होना परत रहिस। गर्मि म ये समस्या अऊ गंभीर हो जात रहिस। वोखर बाड़ी तीर एक छोटकन जुन्ना ढोड़ी रहिस, वो ह बरसात के बाद जड़काला आत-आत सूखा जात रहिस। मनरेगा के अंतर्गत तीन साल पहिली खेत म कुंवा के खुदाई के बाद वोखर ये समस्या मन अब दूर हो गए हे। अब वोखर तिर निस्तारी अऊ सिंचाई बर भरपूर पानी हे। कुंवा ह ओ ल न केवल रोज-रोज के पानी के दिक्कत ले छुटकारा देवाए हे, भलुक धान के बाद गेहूं अऊ सब्जि मन के खेती के रद्दा घलोक खोल देहे हे।
पांच सदस्य वाले परिवार के मुखिया समयलाल के बताती तीन साल पहिली वो ह गांव म आए जीपीडीपी (ग्राम पंचायत विकास योजना) दल ले अपन समस्या साझा करे रहिस। दल के सुझाव म ग्राम पंचायत ह वोखर समस्या के समाधान बर मनरेगा ले खेत म कुंआ निर्माण के रद्दा निकालिस। एखर बर एक लाख 80 हजार रूपिया के राशि मंजूर करे गीस। कुवां के खोदई के समय वोखर परिवार ल 120 मानव दिवस के सीधा रोजगार घलोक मिलीस, जेखर एवज म ओ ल 20 हजार 880 रूपिया के मजदूरी मिलीस। वो ह ये रकम ले बिजली ले चलइया पंप बिसाईस जेखर उपयोग ओ ह अब कुंवा ले अपन खेत अऊ बाड़ी के सिंचाई बर करत हे।