बस्तर/ सरकार के 2 साल पूरा होय के मौका म बस्तर संभाग म अब ‘दुग्ध क्रांति’ के सुरुआत हो गे हे। कोंडागांव अउ कांकेर जिला म अब आदिवासी महिला मन ल डेरी (दूध) के धंधा ले जोड़ के उनला लखपति बनाय के तैयारी चलत हे।
1. 70 हजार के सीधा फायदा:
ए योजना के तहत 2 ठन दुधारू गाय लेहे बर 1.40 लाख रुपिया के लागत आथे, जेमा राज्य सरकार 50% यानी 70 हजार रुपिया के छूट (अनुदान) देवत हे। बाकी पइसा बैंक ले आसान लोन म मिलही अउ 10% हितग्राही ल मिलाय ल परही।
2. पंजाब-राजस्थान के ‘साहीवाल’ गाय:
सरकार ह महिला मन बर पंजाब अउ राजस्थान ले बढ़िया नसल के ‘साहीवाल गाय’ मंगात हे, जे दिन भर म 8 ले 10 लीटर दूध देथे। अभी तक 24 महिला मन ल 36 गाय बांट दे गे हे।
3. घर बइठे कमई:
ए गाय मन के दूध ल बेच के एक झन महिला महिना म लगभग 13,000 रुपिया तक कमा सकत हे। लोन के क़िस्त पटाय बर बैंक जाय के झंझट तको नइये, दूध के बिल ले ही पैसा कट जाही।
4. साल भर सब कुछ मुफ्त:
योजना म गाय के संगे-संग एक साल बर बीमा, 5 किलो साइलेज चारा, 2 किलो पशुआहार अउ दवाई-पानी घलो मुफ्त म मिलही।
भविष्य के तैयारी:
मुख्यमंत्री विष्णु देव साय ह ए योजना के सुरुआत जून 2025 म कोंडागांव ले करे रिहिन। आगु 5 साल म बस्तर म 1 लाख लीटर क्षमता वाला दूध प्रोसेसिंग प्लांट लगाय के तैयारी हे, जेखर ले हजारो लोगन ल रोजगार मिलही।
