छत्तीसगढ़ मिलेट कार्निवाल: राष्ट्रीय स्तर के विशेषज्ञ बताहीं मिलेट के फायदा

रायपुर, राजधानी रायपुर के सुभाष स्टेडियम म चलत छत्तीसगढ़ मिलेट कार्निवाल म काल 18 फरवरी के देश के नामी शेफ श्री विकास चावला अऊ नीरज त्यागी मिलेट के नवा-नवा व्यजन बनाना सिखाहीं। मनखे मन के बीच उमन लाईव डिमोस्टेशन घलोक देहीं। एखर आलावा राष्ट्रीय स्तर के विशेषज्ञ दैनिक आहार म मिलेट ल सामिल करे अऊ एखर फायदा के संबंध म मनखे मन ले चर्चा करहीं।
मिलेट कार्निवाल म 18 फरवरी के निरधारित कार्यक्रम के मुताबिक मंझनिया 2.15 बजे ले छत्तीसगढ़ म मिलेट के खेती अउ उपार्जन: चुनौती अउ अवसर उपर संगोष्ठी, 3.15 बजे ले नामी शेफ श्री विकास चावला, रेस्टोरेंट सलाहकार अउ शेफ श्री नीरज त्यागी मिलेट के व्यंजन बनाना सिखाहीं। अइसनहे संझा 4.15 बजे ले ‘मिलेट प्रसंस्करण अऊ मूल्यवर्धन‘ उपर संगोष्ठी अऊ पाक कला प्रतियोगिता के आयोजन होही। संझा 7 ले 8 बजे तक सांस्कृतिक कार्यक्रम के आयोजन संस्कृति विभाग कोति ले करे जाही। ए कार्यक्रम मन के बीच-बीच म मिलेट ले जुड़े कई ठन पहलु मन के जानकारी के संबंध म नुक्कड़ नाटक के आयोजन होही।