रायपुर, जांजगीर-चांपा जिला के अकलतरा विधानसभा क्षेत्र के मुलमुला ग्राम के श्रीमती मीना बाई मानिकपुरी ल ठेकेदार के चंगुल ले छुट के नवा जीवनदान मिले हे। श्रीमती मानिकपुरी अपन उपर गुजरे दुख ल बतात कहिस के हमर रिहाई कोनो डरभुतहा सपना ले कम नइ हे। हम जम्मो 30 मजदूर मन पाछू एक बछर ले कर्नाटक के चित्रदुर्ग जिला के ईट भट्टा म बंधक बनके मजदूरी करत रहेन। जिहां हम सबो भय अऊ आतंक के छांव म जीवन जीयत रहेन। हमर उपर अतका बंदिश रहिस कि हाट बाजार जाय म हमार पीछू ठेकेदार के मनखे संग जात रहिन। मजदूरी के पइसा मांगे म हमला ठेकेदार ह मार डारे के धमकी देत रहिस अऊ संगेच हमला ये बताए गीस के हमार मेट ह हम सबो झन ल 5 लाख रुपिया ठेकेदार ले लेके बेच देहे हे। ठेके दार ह कहय के तुमन कचरा ईंटा बनाथव त खाए म घलोक कचरा सामान ही मिलही। ये डरभुतहा महोल म मौत के छांव हमेशा मंडरात रहय। रहि-रहिके मन डेरावय के हम कभू अपन घर वापस देख पाबो के नहीं। कहूं इहें हमर मौत तो नइ हो जाही।
श्रीमती मीना बाई के बताती एक साल पहिली हम सब झन ल हमार गांव मुलमुला ले लवन लाए गीस। लवन ले रायपुर, रायपुर ले गोंदिया, गोंदिया ले अरंगपुर ले ईट भट्टा म पहुंचा दे गीस। छत्तीसगढ़ राज्य के मुखिया श्री भूपेश बघेल के नेतृत्व म लोक स्वास्थ्य यांत्रिकी अउ ग्रामोद्योग मंत्री गुरु रूद्रकुमार के पहल म पाछू दिन कर्नाटक के चित्रदुर्ग जिला के एक भट्टा ले ए मजदूर मन ल छोड़वा के इंकर घर भेजे गीस। राज्य सरकार कोति ले पलायन नीति के तहत ए मन ल प्राथमिकता ले रोजगार देवाए जाही। श्रीमती मानिकपुरी अपन रिहाई के बाद अड़बड़ भावुकता ले राज्य सरकार के आभार व्यक्त करिस अऊ नवा जीवनदान मिले बर सरकार ल धन्यवाद दीस।
हम आप ल बता देवन के मुलमुला के समाज सेवी रमाकांत सिंह ल इंकर परिवार के मन बताईन के इमन ल इंटा भट्ठा म बंधक बना लेहे गए हे अउ ठेकेदार ह इमन ल ना तो पईसा देवत हे अउ ना जान देवत हे त रमाकांत सिंह ह सरकार के सहयोग लीस अउ स्वयं जोखिम उठात इमन ल छोड़ा के लाईस। इंकर रायपुर ले घर तक के जाए के टिकिट उ के बिवस्था करिस अउ इंकर रहे-खाए के व्यवस्था तको करिस।
