मिनी माता महतारी जतन योजना ले रोशनी यादव के मातृत्व ला मिलिस आर्थिक संबल, प्रसव बाद मिलिस बीस हजार रूपिया

CHHATTISGARHI NEWS: कोण्डागांव, छत्तीसगढ़ शासन ह श्रमिक परिवार मन के सामाजिक अऊ आर्थिक सशक्तिकरण बर सरलग कई प्रकार के जनकल्याणकारी योजना चलावत हे। श्रम विभाग के माध्यम ले पंजीयन करा डरे श्रमिक मन ला शिक्षा, स्वास्थ्य, बीमा अऊ सामाजिक सुरक्षा ले जुड़े योजना के लाभ देहे जात हे, जेकर से विपरीत परिस्थिति म परिवार मन ला आर्थिक सहारा मिलत हे।
इही कड़ी म ‘सेवा मेरा योगदान’ शिविर के दौरान कोण्डागांव के अस्पताल वार्ड के रहवइया श्रीमती रोशनी यादव ला प्रसूति के बाद श्रम विभाग के ‘मिनी माता महतारी जतन योजना’ के लाभ मिलिस। ए योजना के तहत ओला बीस हजार रूपिया के एकमुश्त आर्थिक सहायता राशि प्रदान करे गीस। ये राशि ओखर लइका के स्वास्थ्य, पोषण अऊ जरूरी देखभाल बर बहुत उपयोगी साबित होत हे।
श्रीमती यादव बताइस के प्रसव के बाद नवजात शिशु के देखभाल के संग दवइ, पोषण अऊ दूसर जरूरत के खर्चा ला लेके चिंता रहिस। अइसन समय म शासन ले मिले बीस हजार रूपिया के ये सहायता ओखर परिवार बर बड़का आर्थिक संबल बन के आए हे। योजना के लाभ मिले ले ओ ह शासन के प्रति आभार व्यक्त करिस।
जानबा हे के छत्तीसगढ़ शासन के ए योजना के तहत पंजीकृत महिला निर्माण श्रमिक मन ला पहिला दू लइका के प्रसव म बीस हजार रूपिया के आर्थिक सहायता देहे जाथे। ए योजना के मुख्य उद्देश्य आर्थिक रूप ले कमजोर श्रमिक परिवार के माता मन अऊ लइका मन ला स्वास्थ्य अऊ पोषण संबंधी जरूरत बर मदद देना हे। श्रम विभाग के अइसन योजना मन ले माता अऊ नवजात शिशु मन के बेहतर देखभाल होवत हे।