- मुख्यमंत्री ह मिनीमाता के स्मृति दिवस समारोह म करिस ऐलान
- मिनीमाता ल उंखर पुण्यतिथि म दीन विनम्र श्रद्धांजलि
- गिरौदपुरी धाम ल गरिमा के अनुसार छत्तीसगढ़ के प्रमुख स्थल के रूप म करे जाही विकसित
- मिनीमाता के स्मृति म छत्तीसगढ़ म 11 कन्या छात्रावास मन बर अगले बजट म दीए जाही स्वीकृति
रायपुर, मुख्यमंत्री श्री भूपेश बघेल ह कहिन हे कि छत्तीसगढ़ म अनुसूचित जाति मन ल उंखर जनसंख्या के अनुपात म आरक्षण देहे के व्यवस्था बहुत जल्दी करे जाही। मुख्यमंत्री ह छत्तीसगढ़ के पहिली महिला सांसद मिनीमाता जी के पुण्यतिथि के अवसर म आयोजित समारोह म ये घोषणा करिन। समारोह के आयोजन आज राजधानी रायपुर के नवा बस स्टैंड स्थित मिनीमाता उद्यान म करे गीस। मुख्यमंत्री ह मिनीमाता के प्रतिमा उपर माल्यार्पण करके उंखर पुण्यतिथि म ओ मन ल विनम्र श्रद्धांजलि दीन।
श्री बघेल ह ये बेरा म सतनाम पंथ के प्रवर्तक बाबा गुरु घासीदास के जन्मस्थली अऊ तपोभूमि गिरौदपुरी धाम ल ओखर गरिमा के अनुसार विकसित करे बर हर संभव सहयोग के घोषणा करिन।
मुख्यमंत्री ह मिनीमाता के स्मृति म छत्तीसगढ़ म 11 कन्या आश्रम चालू करे के मांग ल राज्य सरकार के आगामी बजट म सामिल करे के आश्वासन दीन। उमन मिनीमाता गृह निर्माण सहकारी समिति ल नवा रायपुर म जमीन आवंटित करे के मांग म घलोक सहानुभूति पूर्वक विचार करे के आश्वासन दीन। कार्यक्रम म गुरूघासीदास साहित्य अऊ संस्कृति समिति के अध्यक्ष श्री के.पी. खाण्डे ह मांग पत्र प्रस्तुत करत कहिन कि प्रदेश म अनुसूचित जाति मन ल 12 प्रतिशत आरक्षण देहे जावत हे जबकि जनगणना के अनुसार छत्तीसगढ़ अनुसूचित जाति मन के जनसंख्या 12.8 प्रतिशत हे।
स्व. मिनीमाता ल श्रद्धांजलि अर्पित करत मुख्यमंत्री श्री भूपेश बघेल ह कहिन कि बाबा गुरु घासीदास ह समाज के कमजोर वर्ग के सामाजिक उत्थान बर जऊन काम चालू करिन, ओ मन ल कानूनी जामा पहिनाए के काम सांसद के रूप म स्वर्गीय मिनीमाता ह पूर्व प्रधानमंत्री श्रीमती इंदिरा गांधी के संग मिलके संसद म करिन। संसद म अस्पृश्यता निवारण कानून पारित कराए म उंखर महत्वपूर्ण योगदान रहिस। उमन कहिन कि मिनीमाता ह अपन पूरा जीवन समाज बर समर्पित कर दीन। मिनीमाता हर समाज बर संसद म अवाज बुलंद करत रहिन अऊ ओ मन ल न्याय देवाए के भरसक उदीम करत रहिन।
छत्तीसगढ़ बर ऊंखर करे काम मन ल हमेशा याद रखे जाही। कार्यक्रम म विधायक श्री मोहन मरकाम, विधायक अऊ पूर्व मंत्री श्री अमितेश शुक्ल, राज्यसभा सांसद श्रीमती छइंहा वर्मा, नगर निगम रायपुर के महापौर श्री प्रमोद दुबे ह घलोक अपन विचार प्रकट करत मिनीमाता ल श्रद्धांजलि दीन। ये बेरा म गुरु घासीदास साहित्य अऊ संस्कृति समिति के अध्यक्ष श्री के पी खंडे ह मांग पत्र प्रस्तुत करिन। श्री सुंदर लाल जोगी, डॉ. जेआर सोनी संग समाज के बहुत अकन पदाधिकारी, जनप्रतिनिधि अऊ नागरिक बड़ संख्या म उपस्थित रहिन। कार्यक्रम के आयोजन नगर निगम रायपुर कोति ले करे गीस।