मिनीमाता के नारी उत्थान, श्रमिक कल्याण अउ छूआछूत निवारण के बूता प्रेरणास्पद : मुख्यमंत्री दाउ भूपेश बघेल

रइपुर, 11 अगस्त 2021 बुधवार। मुख्यमंत्री दाउ भूपेश बघेल ह आज अपन घरू कार्यालय ले वीडियो कॉन्फ्रेंसिंग ले ’मिनीमाता स्मृति दिवस’ के कार्यक्रम ल सम्बोधित करत कहीन कि मिनीमाता ह नारी उत्थान, श्रमिक कल्याण अउ छूआछूत निवारण के क्षेत्र म बड़का बूता करे हावयं। लोकसभा अस्पृश्यता निवारण विधेयक पारित कराइन हे। उन्कर समतामूलक समाज के सपना हर छत्तीसगढ़िया के सपना रिहिस। छत्तीसगढ़ सरकार उन्कर सपना के अनुरूप शोषण, भेदभाव, अत्याचार ले मुक्त अउ समतामूलक समाज के निर्माण बर सरलग प्रयासरत हवय। मुख्यमंत्री ह पूर्व सांसद मिनीमाता ल श्रद्धांजलि अर्पित करके कार्यक्रम के शुभारंभ करीन।
मुख्यमंत्री ह कहीन कि छत्तीसगढ़ के पहिली माइलोगन सांसद ममतामयी मिनीमाता जी के व्यक्तित्व, उन्कर संघर्ष अउ योगदान ल कभू भुलाय नई जा सकय। मिनीमाता गुरू अगमदास लोकसभा सांसद रिहिन उन्कर मउत के बाद लोकसभा सदस्य बनीस। वोमन 1952 ले 1972 तक लोकसभा सदस्य रहीन। राजनीतिक जीवन शुरू होए के बाद मिनीमाता ह सामाजिक उत्थान के बूता ल तेज करीन। बुराई अउ विसंगति मन ल मेटारे बर उदीम करीन।
राज्य सरकार ह उन्कर सपना ल साकार करत कोरोना संकट काल म किसान, मजदूर, श्रमिक अउ असहाय मन के हित म सरलग बूता करीस अउ ये आपदा के मुकाबला करीस। नगरीय प्रशासन मंत्री डॉ.शिवकुमार डहरिया ह कहीन कि सतनामी समाज के गुरू अगमदास ले विवाह के बाद मिनीमाता सरलग महिला उत्थान, अस्पृश्यता निवारण के दिशा म बूता करे लगीस। उन्कर योगदान हम सबो बर प्रेरणाप्रद हे।