मजूरी करइया सुनीता साहू ल मिनीमाता महतारी जतन योजना ले मिलिस संबल

CHHATTISGARHI NEWS: सारंगढ़-बिलाईगढ़, रोजी मजूरी के भरोसा परिवार चलावत एक दाई बर अपन लइका मन के बेहतर भविष्य के सपना देखना आसान नो हे। सारंगढ़-बिलाईगढ़ जिला के ग्राम उच्च मिट्ठी के रहइया सुनीता साहू बर घलो हर दिन के संघर्ष इही रहिस के सीमित कमाई म लइका मन के देखभाल अऊ पोषण कइसे होही। फेर छत्तीसगढ़ शासन के ‘मिनीमाता महतारी जतन योजना’ ह ए श्रमिक परिवार के चिंता ला नवा आत्मविश्वास अऊ उम्मीद म बदल दीस।
सुनीता साहू पेशा ले रेजा मजदूर हे। रोज रांपा-तगाड़ी उठा के पसीना बहाए के बाद मिले मजदूरी ले ही ओखर घर के चूलहा जलत रहिस। सीमित साधन के बीच लइका मन के खान-पान, कपड़ा अऊ स्वास्थ्य जइसे बुनियादी जरूरत ला पूरा करना ओखर बर बहुत बड़े आर्थिक चुनौती रहिस। ए समय म श्रम विभाग के मिनीमाता महतारी जतन योजना ओखर जीवन म बड़का संबल बन के आइस।
ए योजना के तहत ओखर बैंक खाता म सीधा बीस हजार रूपिया के सहायता राशि डारे गीस। ये राशि सिरिफ कोनो वित्तीय मदद भर नो हे, बल्कि संकट के समय म एक दाई के हाथ ला मिले ओ सहारा हे, जेकर से ओ अपन लइका मन के पोषण अऊ देखभाल ला बिना कोनो तनाव के पूरा कर सकथे। सुनीता बताथे के कठिन समय म मिले ये सीधा सहायता ओखर परिवार बर बहुत मायने रखथे।
शासन के ये योजना ओखर मन म ये भरोसा जगाए हे के आर्थिक अभाव अब ओखर लइका मन के उज्ज्वल भविष्य के रद्दा म बाधा नइ बनय। ये योजना सुनीता जइसे हजारों श्रमिक परिवार के संघर्ष ला कम करके लइका मन के काली ला संवारे के सशक्त काम करत हे।