Minimata Mahtari Jatan Yojana
महासमुंद के जागृति ल मिलीस 20 हजार के चेक
महासमुंद, 21 जुलाई 2024। छत्तीसगढ़ सरकार कोति ले गर्भवती महिला मन ल सहायता देहे बर मिनीमाता महतारी जतन योजना के शुरुआत करे गए हे। ए योजना के माध्यम ले उन गर्भवती महिला मन ल सहायता प्रदान करे जात हे, जेन भवन निर्माण अउ असंगठित क्षेत्र म निर्माण काम म मजदूरी करथें या जिनकर पति मजदूरी करथे। ए योजना ले श्रमिक परिवार म जच्चा अऊ लइका के देखभाल अब आसान हो गए हे। सरकार गर्भवती महिला मन के संस्थागत डिलीवरी बर 20 हजार रूपिया के सहायता देथे।
महासमुंद जिला म मिनीमाता महतारी जतन योजना के शुरुआत ले अब तक 8846 हितग्राही मन ल लाभ मिले हे। जेमां सुभाष नगर, महासमुंद के श्रीमती जागृति साहू ल 20 हजार रूपिया के सहायता राशि प्रदान करे गए हे। जागृति ह बताइस कि ओ ह छत्तीसगढ़ भवन अउ आन सन्निर्माण कर्मकार कल्याण मंडल म पंजीकृत श्रमिक हे। वो ह योजना के तारीफ करत कहिस के प्रदेश सरकार आर्थिक रूप ले कमजोर परिवार मन ल लाभ पहुंचाए बर सरलग काम करत हे। वो ह बताइस के मिले पईसा के उपयोग लइका के रहन-सहन अऊ उचित देखभाल म करे जात हे।
जानबा हे कि मिनीमाता महतारी जतन योजना के लाभ लेहे बर महिला श्रमिक मन के छत्तीसगढ़ भवन अउ आन सन्निर्माण कर्मकार कल्याण मंडल अंतर्गत पंजीकृत होना अनिवार्य हे। योजना के लाभ लेहे बर हितग्राही ल लइका के जन्म के 90 दिन के भीतर श्रमिक पंजीयन प्रमाण पत्र, राशन कार्ड, आधार कार्ड, उत्तराधिकारी के आधार कार्ड, बैंक पासबुक, मोबाइल नंबर, शिशु के जन्म प्रमाण पत्र अउ असली कागद के संग श्रम विभाग, लोक सेवा केंद्र या वीएलई के माध्यम ले ऑनलाइन आवेदन करना होही।
