मिनीमाता महतारी जतन योजना: गर्भवती अऊ नवजात शिशु के पोषण बर होवत हे बढ़िया इंतजाम

CHHATTISGARHI NEWS: मुंगेली, छत्तीसगढ़ शासन के महत्वपूर्ण ‘मिनीमाता महतारी जतन योजना’ ह गर्भवती अऊ लइकोरी महिलामन के स्वास्थ्य सुरक्षा अऊ पोषण के दिशा म एक वरदान साबित होवत हे। ए योजना के सुग्घर लाभ पाके सोढ़ार गांव के गांधीनगर म रहवइया श्रीमती नंदरानी साहू ह बहुत खुस हें अऊ ओ ह शासन-प्रशासन के प्रति आभार जताए हे। योजना के तहत मिलइया सहायता अऊ संबल ले नन्दरानी ल गर्भधारण के बेरा म अऊ बच्चा के जनम के बाद अपन खुद के स्वास्थ्य, खान-पान अऊ नवजात शिशु के पोषण बर भरपूर मदद मिले हे।
गरीबी रेखा के नीचे जीवन बितावत अऊ श्रमिक परिवार के महिलामन बर गर्भावस्था के बेरा म मजदूरी छोड़ना पड़थे, जेन बेरा म आर्थिक तंगी के सेती पौष्टिक आहार लेना कठिन हो जाथे। इही समस्या के समाधान बर ‘मिनीमाता महतारी जतन योजना’ ह गर्भवती महिलामन ल वित्तीय सहायता देके ओमन के पोषण अऊ देखभाल के पूरा इंतजाम करथे, ताकि दाई अऊ लइका दुनो झन स्वस्थ रइथें। नन्दरानी के अनुभव बताथे के कइसे ए योजना के जरिए ओ ल सही समय म सहायता मिलिस, जेकर से ओ अपन अऊ अपन नवजात लइका के सेहत के बेहतर ढंग ले खियाल रख सकिस।
योजना के ए सकारात्मक प्रभाव ले ग्रामीण इलाका के जम्‍मो महिलामन म जागरूकता बढ़थे अऊ ओमन स्वास्थ्य सेवा मन के लाभ लेवत हें। ए प्रकार के जनकल्याणकारी पहल ले मातृ मृत्यु दर अऊ शिशु मृत्यु दर म कमी आत हें, अऊ स्वस्थ समाज के निर्माण होवत हें। महिलामन बर ए योजना एक मजबूत सहारा बन के आए हे, जेन राज्य सरकार के संवेदनशीलता ल परखर ले चरितार्थ करत हे।