बेमेतरा, 29 अगस्त 2024। खाद्य, नागरिक आपूर्ति अउ उपभोक्ता संरक्षण मंत्री श्री दयाल दास बघेल ह कहिन के भगवान श्री कृष्ण ह हमला कर्म के प्रधानता के शिक्षा देहे हें। उमन अपन लीला ले हमला जीवन जीए के कला सिखाए हें। महाभारत म श्री कृष्ण ह अन्याय के विरुद्ध लड़े के संदेश दीन। खाद्य मंत्री श्री बघेल मंगलवार के बेमेतरा जिला अंतर्गत नगर पंचायत नवागढ़ म आयोजित भगवान श्री कृष्ण जन्माष्टमी के अवसर म श्री कृष्ण झांकी अउ दही लूट महोत्सव कार्यक्रम ल सम्बोधित करत ये बात कहीन। उमन ए बेरा म भगवान श्री कृष्ण अऊ हलधर बलराम के पूजा-अर्चना करके प्रदेशवासी मन बर सुख-समृद्धि के कामना करिन।
मंत्री श्री बघेल ह कहिन कि श्री कृष्ण प्रकृति प्रेमी रहिन। जब हम भगवान कृष्ण ल सुरता करथन त हमला यमुना नदी के सुरता आथे, बांसुरी के तान सुरता आथे अऊ गौ माता के झुंड सुरता आथे। सनातन धर्म म प्रकृति के पूजा करे जाथे। पीपल, बरगद आदि वृक्ष ल पूजनीय माने गए हे। प्रधानमंत्री श्री नरेन्द्र मोदी ह घलोक एक पेड़ मां के नाम लगाय के आह्वान करे हे। मैं सबो ले अनुरोध करत हंव के सबो मन अपन माँ के नाम ले एक पेड़ जरूर लगावव।