रायपुर, 16 जनवरी 2024। आदिम जाति विकास मंत्री श्री रामविचार नेताम आज बलरामपुर दौर के बखत कई ठन आवासीय विद्यालय मन के उदुपहा जांच करिन। उमन विकासखण्ड बलरामपुर अंतर्गत ग्राम भेलवाडीह म संचालित एकलव्य अऊ पहाड़ी कोरवा आवासीय विद्यालय के जायजा लीन अऊ कहिन कि आवासीय विद्यालय मन म रहइया लइका मन ल सबो जरूरी मूलभूत सुविधा उपलब्ध कराए के संग लइका मन ल पौष्टिक भोजन अऊ शुध्द पेयजल उपलब्ध कराए जाय। उमन आवासीय विद्यालय म लइका मन ल देहे जात सुविधा मन संग निर्माणाधीन भवन, खेल मैदान अऊ सामान के उपलब्धता के जानकारी घलोक लीन।
मंत्री श्री नेताम बिहनिया छात्रावास मन के जांच करे विकासखण्ड बलरामपुर के ग्राम भेलवाडीह पहुंचे रहिन। उमन इहां शासन कोति ले संचालित एकलव्य अऊ पहाड़ी कोरवा आवासीय विद्यालय के जांच करिन। उमन आवासीय विद्यालय मन के छात्रावास मन म भोजन व्यवस्था अऊ पीए के पानी के जानकारी लीन। उमन कहिन कि लइका मन ल शुध्द अऊ पौष्टिक भोजन के संगे-संग पीए के साफ पानी उपलब्ध करावव। ये बेरा म उमन लइका मन ले बात करके पढ़ई-लिखई के संग अध्ययन बर पुस्तक के उपलब्धता, शिक्षा के गुणवत्ता, खेल सामान के उपलब्धता के जानकारी लीन।
ये मौका म कलेक्टर श्री रिमिजियुस एक्का, अनुविभागीय अधिकारी राजस्व बलरामपुर, सहायक आयुक्त आदिवासी, जनपद अध्यक्ष, मुख्य कार्यपालन अधिकारी जनपद पंचायत बलरामपुर संग स्थानीय जनप्रतिनिधि उपस्थित रहिन।
लइका मन ल पौष्टिक भोजन अऊ पीए के शुध्द पानी उपलब्ध कराए जाय: मंत्री श्री रामविचार नेताम
