रायपुर, 24 मार्च 2020। सरकार ह देश भर म कोरोना वायरस के महामारी ले बचाव बर तालाबंदी के एलान करे हे। प्रदेश के बड़का कवि, साहित्यकार मन घलव व्हाट्सएप यूनिवसिटी म कोरोना के संबंध म रंग-रंग के कबिता बना-बना के अपन नागरिक करतब के पालन करत हें। अइसन समें म पं. सुन्दरलाल शर्मा सम्मान प्राप्त छत्तीसगढ़ के जनकवि मीर अली मीर जी ह प्रदेश के जम्मो साहित्यकार, रचनाकार कोति ले, ये बेरा म सरकार के बात ल माने अउ अपन घर म रहे के संदेश बर एक वीडियो तको जारी करे हें।
तालाबंदी के ये बेरा म सबो मनखे ठलहा हें अउ अपन घर म रहिके अपन-अपन काम-बुता म रमे हें। ये बेरा म मीर अली मीर जी का करत हें ये बात के जानकारी लेहे बर जब गुरतुर गोठ उंकर व्हाट्स एप ल झांकिस त पता चलिस के जनकवि मीर अली मीर जी ह भउजी मन संग मिलके समे के सहीं सदुपयोग करत बरी-बिजौरी बनाए म मगन हें। चलव हमू मन घलव ये बेरा के सही सदुपयोग करन अउ हमर परम्परा के मुताबिक ठलहा बेरा के काम-बुता ल सकेलन।
जनकवि मीर अली मीर तालाबंदी के बेरा म बनावत हें बरी-बिजौरी
