सुकमा, जिला के विषम भौगोलिक परिस्थिति के बाद घलव मिशन इंद्रधनुष के दिसम्बर महिना के लक्ष्य स्वास्थ्य विभाग ह हासिल कर लेहे हे। हम आप ल बता देवन कि सुकमा जिला के दुर्गम क्षेत्र अऊ विषम भौगोलिक परिस्थिति मन के संग ये साल होए भारी बरसा के सेती कई लइका मन अउ गर्भवती महिला मन टीकाकरण ले वंचित रहि गीन। ए लइका मन अऊ गर्भवती महिला मन के टीकाकरण बर मिशन इंद्रधनुष के तहत दिसम्बर ले मार्च तक हर महिना टीकाकरण के अभियान चलाए जात हे। एखर तहत दिसम्बर महिना म 867 लइका अऊ 211 गर्भवती महिला मन के टीकाकरण करे गीस।
ये अभियान ल पूरा करे बर स्वास्थ्य विभाग के अमला नदी-नाला पार करके अऊ कई किलोमीटर तक पैदल चलके गांव-गांव म दस्तक देहे हें। दुर्गम मार्ग मन म पैदल चलके गांव म पहुंचे के बाद विरल आबादी के समस्या के सामना घलोक ए अमला मन ल करना परिस अऊ कई पईत तो ए मन ल खेत-खलिहान म पहुंचके लइका मन अऊ गर्भवती महिला मन के टीकाकरण करना परिस। स्वास्थ्य विभाग कोति ले मिले जानकारी के मुताबिक ये पइत कई अइसे गांव मन म टीकाकरण के काम करे गीस, जिहां पहिली कभू टीकाकरण होएच नइ रहिस। स्वास्थ्य विभाग कोति ले दूरदराज के ए गांव मन म मनखे मन के स्वास्थ्य परीक्षण घलोक करे गीस अऊ दवई घलोक दिए गीस।
कलेक्टर श्री चंदन कुमार ह ये लक्ष्य ल हासिल करे बर स्वास्थ्य विभाग के सबो अधिकारी अऊ मैदानी कर्मचारी मन ल बधाई दिए हें। उमन कहिन कि ये अभियान के लक्ष्य ल बिना दृढ़ इच्छाशक्ति के प्राप्त करना संभव नइ रहिस। उमन एखर बर महिला अउ बाल विकास विभाग के अधिकारी-कर्मचारी मन के सहयोग के घलोक सराहना करिन।
