मिशन कर्मयोगी: राष्ट्र निर्माण के संकल्प – मुख्यमंत्री श्री साय

क्षमता विकास आयोग अऊ छत्तीसगढ़ शासन के बीच होइस एमओयू
रायपुर, मुख्यमंत्री श्री विष्णु देव साय के आगू काली नवा रायपुर स्थित एक निजी होटल म भारत सरकार के क्षमता विकास आयोग अऊ छत्तीसगढ़ शासन के बीच एक महत्वपूर्ण एमओयू म हस्ताक्षर करे गीस। भारत सरकार के महत्वाकांक्षी योजना मिशन कर्मयोगी के अंतर्गत ए एमओयू म छत्तीसगढ़ शासन कोति ले अपर मुख्य सचिव अऊ छत्तीसगढ़ प्रशासन अकादमी के महानिदेशक श्री सुब्रत साहू अऊ क्षमता विकास आयोग कोति ले सदस्य सचिव श्रीमती वी. ललिता लक्ष्मी ह हस्ताक्षर करिन।
ए बेरा म मुख्यमंत्री श्री विष्णु देव साय ह कहिन के मिशन कर्मयोगी प्रधानमंत्री श्री नरेंद्र मोदी जी के सपना मन ल साकार करइया एक दूरदर्शी मिशन हे। ए मिशन के माध्यम ले देश के सबो शासकीय अधिकारी-कर्मचारी मन म कर्मयोगी के भावना विकसित होही अऊ ओ मन राष्ट्र निर्माण म अपन अमूल्य योगदान देहीं। मुख्यमंत्री ह बताइन के मिशन कर्मयोगी के अंतर्गत छत्तीसगढ़ म चार लाख शासकीय सेवक मन ल सरलग प्रशिक्षण देहे जाही, जिंकर प्रक्रिया चालू हो गे हे। उमन ये घलोक जानकारी दीन के अब तक लगभग 50 हजार अधिकारी-कर्मचारी ए प्रशिक्षण ल सफलतापूर्वक पूरा कर डरे हें।
मुख्यमंत्री ह कहिन के बदलत वैश्विक अऊ राष्ट्रीय परिदृश्य के मुताबिक कौशल विकास आज के अनिवार्यता बन गए हे। ए नवा युग के संग सरलग कौशल उन्नयन अऊ शासन-प्रशासन म उत्कृष्टता के संस्कृति ल बढ़ावा देहे म मिशन कर्मयोगी के भूमिका बहुत महत्वपूर्ण होही। उमन ये घलोक कहिन के छत्तीसगढ़ म जेन सुशासन के स्थापना के उद्देश्य ले काम करे जात हे, ओला नवा ऊँचाई देहे म ये एमओयू एक मील के पत्थर सिद्ध होही। ए साझेदारी के माध्यम ले राज्य के जरूरत मुताबिक नवा प्रशिक्षण पद्धति मन ल अपनाए जाही।
ए बेरा म आयोग के सदस्य डॉ. अल्का मित्तल, मुख्य सचिव श्री अमिताभ जैन, मुख्यमंत्री के प्रमुख सचिव श्री सुबोध सिंह, उद्योग विभाग के सचिव श्री रजत कुमार, मिशन कर्मयोगी योजना के मुख्य कार्यकारी अधिकारी श्री राकेश वर्मा, प्रशासन अकादमी के संचालक श्री टी.सी. महावर अऊ आन वरिष्ठ अधिकारी उपस्थित रहिन।