ग्रुप कैप्टन शुभांशु शुक्ला के उपलब्धि देश के युवा मन बर प्रेरणादायी: मुख्यमंत्री श्री साय

रायपुर, मुख्यमंत्री श्री विष्णु देव साय ह आज शिक्षक दिवस के विशेष अवसर म मुख्यमंत्री निवास परिसर ले स्कूली लइका मन म अंतरिक्ष विज्ञान के प्रति जागरूकता बर मिशन अंतरिक्ष अऊ प्रोजेक्ट जय विज्ञान अभियान के शुभारंभ करिन। ए बेरा म जिला प्रशासन रायपुर अऊ इग्नाइटिंग ड्रीम्स ऑफ यंग माइंड फाउंडेशन अऊ जिला प्रशासन रायपुर अऊ विज्ञान भारती के बीच दू महत्वपूर्ण समझौता होइस, जेकर से लइका मन ल अंतरिक्ष ले जुड़े विषय मन के महत्वपूर्ण जानकारी मिलही।
मुख्यमंत्री श्री साय ह प्रदेशवासी मन कोति ले ग्रुप कैप्टन श्री शुभांशु शुक्ला ल उंखर सफल अंतरिक्ष यात्रा बर बधाई अऊ शुभकामना दीन अऊ उंखर अभिनंदन करिन। उमन गुरूजी मन के भूमिका ल नमन करत सबो ल शिक्षक दिवस के शुभकामना दीन। मुख्यमंत्री श्री साय ह जिला प्रशासन के ए विशेष पहल के सराहना करत कहिन के ए समझौता के उद्देश्य स्कूली पढ़ईया लईका मन म वैज्ञानिक दृष्टिकोण विकसित करना अऊ विज्ञान के प्रति जिज्ञासा अऊ उत्साह ल बढ़ाना हे।
मुख्यमंत्री श्री साय ह कहिन के विज्ञान केवल प्रयोगशाला मन तक सीमित नइ हे, बल्कि ये जीवन जीए के एक सोच हे। विज्ञान सवाल पूछे अऊ तर्क करे के शक्ति अऊ समस्या मन के समाधान खोजे के क्षमता देथे। उमन विश्वास व्यक्त करिन के प्रोजेक्ट जय विज्ञान के अंतर्गत आयोजित कार्यशाला, विज्ञान प्रदर्शनी, प्रतियोगिता अऊ नवाचारी परियोजना मन पढ़ईया लईका मन ल नवा चीज सीखे अऊ आत्मविश्वास बढ़ाय के अवसर देही।
मुख्यमंत्री ह कहिन के ए पहल ले छत्तीसगढ़ के लइका मन ज्ञान के उपभोक्ता अउ नवा विचार अऊ खोज के सृजनकर्ता बनहीं। इही आत्मनिर्भर भारत अऊ विज्ञान-आधारित समाज के सच्चा नींव ये।
मुख्यमंत्री ह लइका मन ले आह्वान करिन के ओ मन श्री शुभांशु शुक्ला ले प्रेरणा लेके अपन रुचि के क्षेत्र म आगू बढ़ंय अऊ अपन अऊ देश के नाव ऊँचा करंय। ए बेरा म शिक्षा मंत्री श्री गजेंद्र यादव, कलेक्टर रायपुर श्री गौरव कुमार सिंह, प्रदेश भर ले जुड़े स्कूली छात्र-छात्रा अऊ शिक्षकगण उपस्थित रहिन।