धमतरी, आमजनता ले संबंधित प्रमुख सेवा मन ल सुगम अऊ सरल बनाए खातिर मुख्यमंत्री श्री भूपेश बघेल ह श्रम दिवस के दिन एक मई के मुख्यमंत्री मितान योजना लागू करे हें। योजना के तहत आम नागरिक ज़रूरी प्रमाणपत्र घर बइठे आसानी ले प्राप्त करत हें। इही कड़ी म नगर पालिक निगम धमतरी के सदर दक्षिण वार्ड रामबाग निवासी प्रदीप कोसरिया परिवार ल सिरिफ 18 घंटा म ही वोखर नवजात पुत्र ऋत्विक कोसरिया के जन्म प्रमाण पत्र घरे म ही मिल गे।
बात ये हे कि श्री प्रदीप कोसरिया ह अपन नवजात पुत्र के जन्म प्रमाण पत्र बर मुख्यमंत्री मितान योजना के तहत आवेदन करे रहिस। प्रमाण पत्र बने के बाद धमतरी जिला कलेक्टर श्री पी.एस. एल्मा ह खुदे प्रदीप कोसरिया के घर पहुंच के नवजात पुत्र ऋत्विक के जन्म प्रमाण पत्र दीन। कलेक्टर के हाथ जन्म प्रमाण पत्र पाके कोसरिया परिवार के उत्साह दुगुना हो गे।
जानबा हे कि श्री प्रदीप कोसरिया के पत्नी श्रीमती पूर्णिमा कोसरिया ह 20 मार्च 2022 के पुत्र ल जन्म देहे रहिस, जेखर नाम ऋत्विक रखे गए हे। उमन अपन पुत्र के जन्म प्रमाण-पत्र बर टोल फ्री नंबर 14545 म कॉल करिन। कॉल करे के सिरिफ 18 घंटा के भीतर ही ‘मितान‘ बने कलेक्टर अऊ निगम आयुक्त श्री मनीष मिश्रा के हाथ आवेदक के घर म दम्पति ल शिशु के जन्म प्रमाण पत्र सौंपे गीस। श्री कोसरिया ह राज्य सरकार के ये जल्दी कार्यवाही के योजना बर मुख्यमंत्री श्री भूपेश बघेल के प्रति आभार व्यक्त करिस अऊ कहिस कि जेन प्रमाण-पत्र मन बर पहिली काफी मशक्कत करना परत रहिस, आज घर बइठे बड़ सहजता अउ सरलता ले मिलत हे। उमन ‘मुख्यमंत्री मितान योजना‘ ल आमजनता बर बेहद कारगर अऊ उपयोगी बताइन।
मुख्यमंत्री मितान योजना : सिरिफ 18 घण्टा म ही कोसरिया परिवार ल मिलीस जन्म प्रमाण-पत्र
