मितानिन दिवस : मितानिन मन के करे गीस सम्मान

रायपुर, मितानिन दिवस के अवसर म आज कलेक्टोरेट परिसर स्थित रेडक्रास सभाकक्ष म मितानिन मन के सम्मान करे गीस। कार्यक्रम म जिला पंचायत रायपुर के अध्यक्ष श्रीमति डोमेश्वरी वर्मा मुख्य अतिथि के रूप म सामिल होइन। उमन सबो ब्लॉक ले पहुंचे मितानिन मन ल बधाई दीन अऊ प्रमाण पत्र दीन। मुख्य चिकित्सा अऊ स्वास्थ्य अधिकारी रायपुर डॉ मीरा बघेल ह मितानिन मन के काम के प्रशंसा करत कहिन के कोविड काल जइसे कठिन समय म घलोक मितानिन मन ह मन लगाकर अच्छा काम करे हें अऊ लोगन ल जागरूक करे अऊ टीकाकरण बर प्रेरित करे जइसे बहुत अकन काम करे हें।
जानबा हे कि छत्तीसगढ़ म हर बछर 23 नवम्बर के मितानिन दिवस मनाए जाथे। मितानिन ग्रामीण अऊ शहरी क्षेत्र म स्वास्थ्य विभाग के रीढ होथे। मितानिन कार्डिनेटर प्रियंका ह बताइस कि छत्तीसगढ़ राज्य के ग्रामिण क्षेत्र म मितानिन कार्यक्रम साल 2002 ले संचालित करे जात हे। मितानिन एक स्‍व सेवी कार्यकर्ता होथे हे जेन समुदाय ल स्वास्थ्य ले जोड़इया कडी के रूप म काम करथे अऊ समुदाय ल प्राथमिक सेवा उपलब्‍ध कराथे अऊ शासन के स्वास्थ्य संबंधी योजना मन के लाभ देवाए म सहयोग करथे।
मितानिन मन ह ग्रामीण अऊ शहरी स्लम के स्वास्थ्य म सुधार लाय के दिशा म महत्वपूर्ण योगदान देहे हें। छत्तीसगढ़ म साल 2011 ले हर बछर 23 नवम्बर के मितानिन दिवस मनाए जाथे। रायपुर जिला के ग्रामीण क्षेत्र मन म सबो चारों विकासखंड म 2004 मितानिन अऊ शहरी क्षेत्र म 1150 मितानिन संग कुल 3154 मितानिन हें।