राजधानी रायपुर म आयोजित “नवा सौगात” कार्यक्रम म मिलीस सम्मान
9 लइका मन ल कुपोषण ले मुक्ति देवाए म निभाईस अहम भूमिका
रायपुर, 12 जुलाई 2024। मुख्यमंत्री श्री विष्णुदेव साय के अगुवइ म छत्तीसगढ़ के सरकार महिला सशक्तिकरण ल आगू बढ़ाए बर सरलग उदीम करत हे। एही बीच साय सरकार ह मितानिन मन के हित म एक पहल करे हे। मुख्यमंत्री श्री साय ह आज मितानिन मन के खाता म प्रोत्साहन राशि आनलाइन ट्रांसफर करे हे। राजधानी रायपुर के पंडित दीनदयाल उपाध्याय ऑडिटोरियम म आयोजित “नवा सौगात” कार्यक्रम म मुख्मंत्री श्री साय ह उपस्थित होके प्रदेश के लगभग 73 हजार 831 मितानिन, प्रशिक्षक अऊ समन्वयक मन के खाता म कुल 90 करोड़ 8 लाख 84 हजार रुपिया के मितानिन प्रोत्साहन राशि के अंतरित करिन। सीधा खाता म पइसा पाके मितानिन मन म खुशी के लहर हे।
स्वास्थ्य के क्षेत्र म उत्कृष्ट काम करइया मितानिन मन ल सीएम ह करिन सम्मानित
“नवा सौगात” कार्यक्रम म राज्य के कई जगा ले आए मितानिन बहिनी मन ल स्वास्थ्य के क्षेत्र म उत्कृष्ट काम करे बर मुख्यमंत्री श्री विष्णुदेव साय ह सम्मानित घलोक करिन। सम्मानित होवइया मितानिन मन म जशपुर जिला के ग्राम बगिया के मितानिन दीदी माधुरी पैंकरा घलोक सामिल हे। जिनला मुख्यमंत्री ह “मितानिन पासबुक” के संग शाल अउ श्री फल देके सम्मानित करिन। ए मौका म मुख्यमंत्री साय ह कई मितानिन बहिनी मन ले बातचीत करिन। इही बीच जशपुर जिला के तहसील कुनकुरी के ग्राम पंचायत बेहराखार (रेंगारी) निवासी मितानिन दीदी श्रीमती मुलिका बाई ले मुख्यमंत्री जी ह सीधा गोठ करिन।
ए दौरान मुख्यमंत्री श्री साय ह सबो मितानिन बहिनी मन ल बधाई अउ शुभकामना देवत कहिन के हमर सरकार पूरा पारदर्शिता के संग काम करत हे अऊ वो राज्य में सुशासन के रद्दा म आगू बढ़त हे। उमन कहिन कि ऊंखर ए सफर म राज्य भर म काम करत 70 हजार ले अधिक मितानिन बहिनी मन के घलोक अमूल्य योगदान हे जिनकर दम म राज्य मातृ मृत्यु दर अऊ शिशु मृत्यु दर म अभूतपूर्व सुधार हासिल करे मे कामयाब होए हे। उमन कहिन कि मितानिन बहिनी मन छत्तीसगढ़ के स्वास्थ्य व्यवस्था के आधार हे जेन सुदूर क्षेत्र मन म जाके घलोक इमानदारी ले काम करत हें।
माधुरी पैकरा ह 9 लइका मन ल कुपोषण ले मुक्ति देवाए म निभाईस अहम भूमिका
कुनकुरी के ग्राम बगिया के मितानिन दीदी माधुरी पैकरा ल स्वास्थ्य के क्षेत्र म उत्कृष्ट काम करे बर मुख्यमंत्री श्री विष्णुदेव साय ह सम्मानित घलोक करिन। श्रीमती माधुरी पैकरा ह बेहतर सेवा भाव ले काम करके 9 लइका मन ल कुपोषण ले मुक्ति देवाए म अहम भूमिका निभाए हें। वो अपन क्षेत्र म पाछू कई बछर ले काम करत हे अऊ कुपोषण मुक्ति, मातृत्व सुरक्षा संग स्वास्थ्य विभाग के कई ठन योजना मन ल जन-जन तक पहुँचाए के काम पूरा इमानदारी ले करत हे।
