लाल भाजी, जिमीकांदा, मुनगा के साग, इडहर कड़ही के चिखिन सुवाद
दरभा के जयमनी ह मुख्यमंत्री ले कहिस के बस्तर आवव त जरूर चिखव खट्टा-चटपटा चापड़ा चटनी के सुवाद
बैगा जनजाति के मितानिन दीदी दसनी बाई मनखे मन तक पहुंचावत हे स्वास्थ्य सुविधा
रायपुर, 12 जुलाई 2024। राजधानी रायपुर म मितानिन दीदि मन ल प्रोत्साहन राशि वितरण बर आयोजित ‘नवा सौगात‘ कार्यक्रम के बाद मुख्यमंत्री श्री विष्णु देव साय ह मितानिन बहिनी मन के संग मंझनिया के भोजन करिन।
मुख्यमंत्री श्री साय पंगत म बस्तर दरभा ले आए मितानिन दीदि जयमनी नाग अऊ कवर्धा के बैगा जनजाति के दसनी बाई के संग भोजन करे बइठिन। भोजन म दही मिर्ची, लाई बड़ी, बिजौरी, चावल पापड़, चना, लाल भाजी, जिमीकांदा, मुनगा के साग, इडहर कड़ी, भरवा करेला, चावल, कोदो चावल, रोटी, मीठा म रागी लड्डू, अंदरसा, गुलगुला, पीड़िया, मठ्ठा आदि परोसे गीस। भोजन के पहिली फ्रूट सलाद घलोक सर्व करे गीस।
मुख्यमंत्री ह मितानिन दीदि मन के संग बड़ चाव के संग भोजन करिन। ए बेरा म उमन जयमनी नाग अऊ दसनी बाई ले बड़ आत्मीयता के संग उंखर कुशल क्षेम पूछीन अऊ कहिन कि अब ऊंखर बैंक खाता म हर महीना प्रोत्साहन राशि सीधा मिल जाही। मुख्यमंत्री ह जयमनी नाग ले बातचीत के समय कहिन कि बस्तर तो कई पइत गए हंव, फेर चापड़ा चटनी के स्वाद चिखे के मौका नइ मिले हे। जयमनी नाग ह कहिस के अब जब बस्तर आहू त खट्टा-चटपटा चापड़ा चटनी के स्वाद खचित चिखहू।
मितानिन बहिनी मन के संग उपमुख्यमंत्री श्री अरुण साव, स्वास्थ्य मंत्री श्री श्याम बिहारी जायसवाल, वन अउ संसदीय काम मंत्री श्री केदार कश्यप, विधायक श्री अनुज शर्मा, विधायक श्री गुरू खुशवंत साहब स्वास्थ्य विभाग के प्रमुख सचिव श्री मनोज कुमार पिंगुआ ह भोजन करिन।
