सरगुजा जिला म 3300 मितानिन मन ल लगभग 4 करोड़ राशि के भुगतान सीधा ऊंखर खाता म
रायपुर, 12 जुलाई 2024। मुख्यमंत्री श्री विष्णुदेव साय ह सुकरवार के प्रदेश में मितानिन मन ल ऑनलाईन प्रोत्साहन राशि जारी करिन। जेमां सरगुजा जिला म 3300 मितानिन मन ल लगभग 4 करोड़ राशि के भुगतान सीधा ऊंखर खाता म करे गीस। सीएमएचओ कार्यालय सभाकक्ष म आयोजित जिला स्तरीय मितानिन सम्मलेन म विधायक अम्बिकापुर श्री राजेश अग्रवाल के अध्यक्षता म कलेक्टर श्री विलास भोसकर के विशिष्ट आतिथ्य म संपन्न होइस। संगेच जिला के जम्मो विकासखण्ड मन म कार्यक्रम के आयोजन स्थानीय जनप्रतिनिधि मन अउ मितानिन दीदि मन के उपस्थिति म करे गीस।
नवा सौगात कार्यक्रम के अंतर्गत मुख्यमंत्री श्री साय के संग पं. दीनदयाल उपाध्याय ऑडिटोरियम रायपुर म आयोजित प्रदेश स्तरीय कार्यक्रम के माध्यम ले मितानिन प्रोत्साहन राशि राज्य स्तर ले सीधा मितानिन दीदि मन के बैंक खाता म भुगतान करे गीस। ए बेरा म विधायक श्री अग्रवाल ह उपस्थित मितानिन मन ल संबोधित करत कहिन कि मितानिन मन ल प्रोत्साहन राशि बर पहिली अगोरा करना परत रहस, फेर अब मुख्यमंत्री श्री साय के निर्देशन म राज्य स्तर ले महिना म निरधारित समय के भीतर राशि प्रदाय करे जाही। उमन कहिन कि मितानिन महिला स्वयंसेवक यें जिनकर भूमिका परिवार स्तर म आउटरीच सेवा, सामुदायिक संगठन निर्माण अऊ स्वास्थ्य प्रणाली म सुधार करे के प्रयास करना हे। मुख्यमंत्री कोति ले देहे गए ए सौगात म उमन सबो मितानिन मन ल बधाई दीन।
कलेक्टर श्री भोसकर ह ए बेरा म कहिन कि आज गांव के आखरी छोर म मितानिन अपन कर्तव्यनिष्ठा के परिचय देवत हें। स्वास्थ्य के संग ही आन शासकीय अउ सामाजिक गतिविधि मन के सुचारू रूप ले संचालन करना मितानिन मन के महत्वपूर्ण भूमिका हे। संस्थागत प्रसव, टीकाकरण, पोषण, डायरिया, उल्टी दस्त, मलेरिया अउ आन स्वास्थ्य कार्यक्रम मन म ग्रामीण स्तर तक एकर जानकारी देहे अऊ सफल क्रियान्वयन म इमन सरलग उदीम करत हें। समाज म महिला मन के स्थिति जतका सशक्त, प्रभावशाली अऊ सुदृढ़ होथे, समाज वोतके जादा उन्नत सभ्य अऊ प्रगितिशील होथे। गाँव म मितानिन मन के सक्रियता ले गाँव-घर म होवइया प्रसव कम होए हे अउ संस्थागत प्रसव म बढ़ोतरी होए हे। कलेक्टर ह जम्मो मितानिन मन ल निर्देश देहे हें के काम आधार म प्रोत्साहन राशि के मूल्यांकन अउ सत्यापन निरधारित समय के पहिली पूरा कराना सुनिश्चित करव ताकि राज्य स्तर म निरधारित समय म राशि मितानिन मन ल मिल सकय।