रायपुर, 17 मई 2020। प्रवासी मजदूर मन के सहूलियत अउ सुविधा के ध्यान रखे म जनप्रतिनिधि अउ समाजसेवी, स्वयंसेवी संस्था मन के मनखे मन घलोक बढ़-चढ़के अपन भागीदारी निभावत हें। राज्य सरकार के संगें-संग जनप्रतिनिधि मन अउ समाजसेवी मन के संवेदनशीलता के एक बानगी रायपुर के टाटीबंध चौंक म देखे ल मिलीस। प्रवासी श्रमिक परिवार मन के तिपत सड़क म उखरा रेंगें ले उंकर पांव मन म छाला मर गए रहिस। जब उहां उमन ल चप्पल देहे गीस त वोमन ये बात बर मुख्यमंत्री श्री भूपेश बघेल के आभार जताइन।
प्रवासी मजदूर मन के संग ऊंखर अपन छोटे-छोटे लइका घलोक हे, जऊन आवागमन ल लेके परेशानी झेलत हें। अइसनहे एक मजदूर परिवार रिंग रोड म अपन घर जाय बर छत्तीसगढ़ शासन के वाहन के अगोरा करत रहिस। ये प्रवासी मजदूर के संग चार-पांच साल के छोट कन लइका घलोक रहिस, जेखर पांव म चप्पल नइ रहिस, वो अपन माता-पिता के संग उखरा पांव सड़क म खड़े रहिस, तभे जरूरी व्यवस्था अऊ सेवा काम बर निकले रायपुर पश्चिम के विधायक श्री विकास उपाध्याय के नजर ओ मासूम लइका उपर परिस। विधायक ले रहे नइ गीस वो ह तुरंते ओ लइका के उमर के हिसाब ले चप्पल के इंतजाम करिस अऊ ओखर पांव म पहिरा दीस। विधायक के ये पहल ले गर्मी के मार सहत मासूम ल तुरंतेच राहत मिलीस, वो बहुत खुश हो गीस। मासूम लइका के माता-पिता ह घलोक विधायक श्री उपाध्याय के ये नेक पहल ल सराहिन अऊ धन्यवाद दीन।
