जशपुरनगर, 15 जुलाई 2020। कलेक्टर श्री महादेव कावरे के मार्गदर्शन म कोरोना वैश्विक महामारी म जिहां एक कोति लाकडाउन के स्थिति हे उहें रोजगार बर पलायन करे प्रवासी मजदूर मन के घर वापसी जारी हे। अइसन म पूरन राम जइसे मनखे छत्तीसगढ़ शासन के महत्वाकांक्षी योजना नरवा, गरूवा, घुरूवा, बाड़ी विकास योजना के तहत् बाड़ी विकास ले जुड़के अऊ मनरेगा ले अपन खेत मन म कुंआ निर्माण करके आर्थिक रूप् ले मजबूत बनत हे।
ये कहानी हे जशपुर जिला के जनपद पंचायत कुनकुरी ले 5 किलोमीटर दूर गांव अम्बाचुआ ग्राम पंचायत बेम्ताटोली के किसान श्री पुरनराम के। पुरनराम ल मनरेगा के तहत् कूप निर्माण बर 2 लाख 10 हजार के जनपद पंचायत कुनकुरी ले राशि स्वीकृत करे गीस। वो ह बताइस के ग्राम पंचायत भवन जाके मनरेगा के तहत् देहे जात सुविधा मन के बारे म जानकारी लीस अऊ अपन नाम ले कूप स्वीकृति बर आवेदन दीस। पंचायत ले ग्रामसभा प्रस्ताव बनाके जनपद पंचायत म वोखर आवेदन ल जमा करे गीस। अऊ ओ ल खेत म कूप निर्माण के स्वीकृति मिल गीस। वोकर बताती के पहिली वोखर पास खेत म पानी के सुविधा नइ होए के सेती खेती बाड़ी के समस्या आती रहिस। बड़ मुश्किल ले धान के एक फसल ले पात रहिस अऊ काम बर ओ ल बाहिर घलोक जाना परत रहिस। कुआं निर्माण होए ले अब ओ ल पानी के समस्या नइ होवत हे।
वो ह जिला प्रशासन अऊ छत्तीसगढ़ शासन ल धन्यवाद देवत कहिस के अब ओ ल अपन लइका मन के पालन-पोषण अऊ लइका मन के बेहतर भविष्य बर उम्मीद के किरण नजर आए हे। मनरेगा के अंतर्गत वोखर खेत म कुंआ स्वीकृत होए के बाद वोकर दू एकड़ के खेती जमीन म वो ह दू फसली धान अउ साग-सब्जि मन के उत्पादन करे लगिस। वोकर बताती लॉकडाउन के विसम हालत म पुरनराम के खेत मन म सब्जी के उत्पादन ले हर महीना 15-20 हजार के आर्थिक आमदनी घलोक होवत हे अऊ ओखर परिवार आर्थिक रूप ले सक्षम होए हे। वो ह परिवार के संग हसी-खुशी जीवन यापन करत हे अऊ ओ ल बाहिर काम बर जाना घलोक नइ परत हे।