कौशल विकास प्राधिकरण कोति ले निर्मित रोजगार संगी एप्प
रायपुर, मुख्यमंत्री श्री भूपेश बघेल अऊ विधानसभा अध्यक्ष डॉ. चरणदास महंत ह आज संझा युवा महोत्सव के समापन समारोह म कौशल विकास प्राधिकरण कोति ले तियार रोजगार संगी मोबाइल एप्प लॉन्च करिन।
कौशल प्रशिक्षण प्राप्त युवा मन ल रोजगार के अवसर देवाए के उद्देश्य ले छत्तीसगढ़ राज्य कौशल विकास प्राधिकरण कोति ले रोजगार संगी मोबाईल एप्प के निर्माण करे गए हे। रोजगार संगी मोबाईल एप्प रोजगार प्रदान करइया संस्था मन या मनखे विशेष अऊ कौशल प्रशिक्षित युवा मन के बीच एक पुल के जइसे काम करही जेमां रोजगार प्रदान करइया संस्था मन या मनखे अपन जरूरत के मुताबिक कौशल प्रशिक्षण प्राप्त युवा मन ले सम्पर्क कर सकत हें अऊ प्रशिक्षित युवक जेमन ल अपन कुशलता अउर रूचि के मुताबिक रोजगार के तलाश हे ओ मन कई ठन संस्था मन म उपलब्ध रिक्ति मन म ले बेहतर के चयन करके रोजगार प्राप्त कर सकहीं।
रोजगार संगी मोबाईल एप्प म मुख्मयंत्री कौशल विकास योजना अंतर्गत चार सौ ले जादा कोर्से म प्रशिक्षित अउर प्रमाणित युवा मन के जानकारी समाहित करे गए हे। ये एप्प के माध्यम ले कोनो संस्था या मनखे अपन जरूरत अनुसार रिक्ति मन के जानकारी पोस्ट कर सकत हें। ये एप्प के माध्यम ले युवा रोजगार कार्यालय म पंजीयन बर आवेदन कर सकत हें। रोजगार कार्यालय ले रोजगार संबंधी रिक्ति मन के जानकारी युवा मन ल अलर्ट के माध्यम ले प्राप्त होही।
ये बेरा म कृषि मंत्री श्री रविन्द्र चौबे, वन मंत्री श्री मोहम्मद अकबर, स्कूल शिक्षा मंत्री डॉ. प्रेमसाय सिंह टेकाम, खेल, कौशल विकास मंत्री श्री उमेश पटेल, संस्कृति मंत्री श्री अमरजीत भगत, गणमान्य विधायकगण संग शासन के वरिष्ट अधिकारी अऊ प्रमुख सचिव कौशल विकास श्रीमती रेणु पिल्ले उपस्थित रहिन।