- पेट पीरा अऊ सांस लेहे म रहिस तकलीफ, मोबाइल मेडिकल यूनिट ले इलाज के बाद होइन ठीक
- मुख्यमंत्री शहरी स्लम स्वास्थ्य योजनाः झुग्गी बस्ती मन म रहईया गरीब परिवार मन के इलाज होइस आसान
रायपुर 19 नवम्बर 2020। 63 बसंत देख डरे सियानिन दाई इंदिरा मनवानी कभू सोंचे नई रहिस के एक दिन अस्पताल अऊ इलाज, ओखर घर के दुवा तक आ जाही। वोकर समझ म तो अस्पताल जवई ह अड़बड़ दुख के सौदा रहिस। वो सोंचय के सहर के अस्पताल जाए ले इलाज के चक्कर म घर अऊ जमीन-जायदाद गिरवी रखा के बुड़ जाथे। फेर पेट अऊ मूड़ पीरा बाढ़े ले मनवानी अस्पताल जाय के विचार करतेच रहिस के मुख्यमंत्री शहरी स्लम स्वास्थ्य योजना ले प्रदेश म शुरू होए मोबाइल मेडिकल यूनिट के टीम ओखर दुवार म उदुपहा आ दमकिस। वोमा वोकर जांच पड़ताल के बाद मुफ्त म दवा घलोक देहे गीस। डाक्टर मन के सलाह अऊ दवा ह इंदिरा के तकलीफ ल तुरते दूर कर दीस। अब इंदिरा मनवानी खुश हे। कुछ अइसनहेच कहानी 55 साल के ललिता गुप्ता के घलव हे। कुछ दिन ले वोला मूड़ म पीरा के शिकायत रहिस अऊ वोला उल्टी जइसे लगत रहिस। जब वोकर घर तीर मोबाइल मेडिकल यूनिट के शिविर लगिस त वो ह घलोक अपन निःशुल्क उपचार कराइस अऊ दवाई के संग ओ ल राहत मिल गीस।
प्रदेश म मोबाइल मेडिकल यूनिट टीम के माध्यम ले झुग्गी बस्ती मन के मनखे मन के निःशुल्क स्वास्थ्य जांच अऊ इलाज होए ले छोटे-छोटे बीमारी ले जूझइया असंख्य परिवार मन म खुशी के एक नवा लहर उठे हे। मुख्यमंत्री श्री भूपेश बघेल अऊ नगरीय प्रशासन विकास मंत्री डॉ शिवकुमार डहरिया के सोच के ही परिणाम हे के स्लम एरिया म रहईया परिवार मन ल ऊंखर घर के तीरेच म इलाज के सुविधा मिलत हे अऊ प्रदेश म मुख्यमंत्री स्लम स्वास्थ्य योजना के तहत संचालित मोबाइल मेडिकल यूनिट हर गली, हर दुवार म पहुचे लगे हे।
नगरीय प्रशासन विकास मंत्री डॉ डहरिया ह अपन प्रभार जिला अंबिकापुर नगर निगम ल 8 मोबाइल मेडिकल यूनिट के सौगात देहे हें। इहां पहली यूनिट के पहुंचतेच चिन्हारी करे गए स्लम एरिया म शिविर लगाके डाक्टर मन के टीम ह इलाज घलोक चालू कर दीस। खास बात ये घलोक हे के सिरिफ 5 दिन म स्लम एरिया के 400 मनखे मन ह अपन निःशुल्क इलाज कराए हें। ये योजना के तहत स्लम क्षेत्र के निवासी मन के स्वास्थ्य के जांच, उपचार, दवा वितरण अऊ स्वास्थ्य परामर्श सुविधा निःशुल्क देहे जात हे। यूनिट म ओपीडी, प्रयोगशाला जांच के संग दवा वितरण अऊ लैब म 41 प्रकार के स्वास्थ्य जांच के सुविधा उपलब्ध हे। निगम क्षेत्र के इमलीपारा निगम काम्प्लेक्स तीर जब शिविर लगाए गीस त खजूरपारा निवासी इंदिरा मनवानी अऊ ब्रम्हरोड निवासी ललिता गुप्ता ह अपन इलाज कराइन। इलाज ले अब उमन अड़बड़ राहत महसूस करत हें। मुख्यमंत्री शहरी स्लम स्वास्थ्य योजना के अंतर्गत 30 नगरीय निकाय के स्लम इलाका मन म नागरिक अऊ श्रमिक मन ल स्वास्थ्य सुविधा उपलब्ध कराए के उद्देश्य ले हॉस्पिटल सह लैबोटरी बस (मोबाइल मेडिकल यूनिट) के शुभारंभ करे गए हे।
