- मोबाईल चोरईया टूरा मन ल राखे रहिस अपन मकान म किराया
- टूरा मन ले कुल 60 नग मोबाईल फोन कीमत करीबन दस लाख रूपिया जप्त
रायपुर, किरायेदार के जानकारी पुलिस ल नइ देहे के आरोप म मकान मालिक ल गिरफ्तार करे गए हे। पुलिस के बताती चाईल्ड लाईन रायपुर के टीम ले सूचना मिले रहिस के थाना तेलीबांधा क्षेत्रांतर्गत सतनामी पारा स्थित तुलसी निवास पहलवान बाड़ा म कुछ नाबालिक टूरा मन संदिग्ध अवस्था म मकान म रूके हें। थाना तेलीबांधा पुलिस ले सूचना के तस्दीक कराए गीस। तस्दीक म पाए गीस के कुछ टूरा मन अपन तीर कई ठन मोबाईल फोन रखे हें अऊ मोबाईल फोन ल एती-तेती ले जाके बेंचे के बात करत हें। सूचना ल वरिष्ठ पुलिस अधीक्षक प्रशांत अग्रवाल ह गंभीरता ले लेत अकतहा पुलिस अधीक्षक शहर तारकेश्वर पटेल, अकतहा पुलिस अधीक्षक अपराध अभिषेक माहेश्वरी, नगर पुलिस अधीक्षक सिविल लाईन वीरेन्द्र चतुर्वेदी अऊ थाना प्रभारी तेलीबांधा सोनल ग्वाला ल तस्दीक कर जरूरी वैधानिक कार्यवाही करे के हुकुम दीन।
थाना प्रभारी तेलीबांधा के सियानी म थाना तेलीबांधा पुलिस, सायबर सेल अऊ चाईल्ड लाईन के संघरा टीम ह ओ जगा म जाके मकान म रेड कार्यवाही करिस। रेड कार्यवाही के बेरा म मकान के कमरा म तीन टूरा मन उपस्थित रहिन, जेमां ले एक टूरा ह अपन नाम राज नोनिया उर्फ नुनिया निवासी वर्धमान पश्चिम बंगाल अऊ दू टूरा मन ह साहेबगंज झारखण्ड के निवासी होना बताइन। टीम के सदस्य मन कमरा के तलाशी लीन त कमरा म अलग – अलग कंपनी के के मोबाईल फोन संग कई महंगा दाम के मोबाईल फोन घलोक मिलिस। टीम के सदस्य मन मोबाईल फोन के बारे म टूरा मन ले बिल या आन वैध कागद के मांग करिन त टूरा मन टीम ल गुमराह करे के प्रयास करत मोबाईल फोन रखे के संबंध म कोनो प्रकार के कोनो बिल या आन कागद प्रस्तुत नइ करे गीस। एकर पाछू टीम के सदस्य मन जब कड़ाई ले पूछताछ करिन त टूरा मन मोबाईल फोन ल चोरी के होना बताइन।
पूछताछ म अपचारी मन बताइन के ओ मन रायपुर के अलग – अलग जगा म घूम – घूम के भीड़-भाड़ वाले जगा मन म जाके मनखे मन के पॉकेट अऊ बैग म रखे मोबाईल फोन ल चोरी करथें अऊ अड़बड़ अकन चोरी के मोबाईल फोन सकलाए म नेपाल ले जाके बेंच देथें। एखर संगेच ये पइत ये अपचारी मन ले कुल 400 नग मोबाईल फोन सकेल के नेपाल ले जाके बिक्री करे के योजना बनाए गए रहिस। तीनों टूरा मन ल गिरफ्तार करके ऊंखर कब्जा ले अलग – अलग कंपनी जेमां एप्पल, आई फोन के महंगा मोबाईल फोन घलोक सामिल हे, के संग कुल 60 नग मोबाईल फोन कीमत करीबन दस लाख रूपिया जप्त करके आरोपी अपचारी बालक मन के विरूद्ध थाना तेलीबांधा म 41(1+4) जा.फौ./379 भादवि. के अपराध पंजीबद्ध करके अग्रिम कार्यवाही करे गीस।
जप्त करे गए चोरी के मोबाईल फोन के संबंध म रायपुर के आन थाना मन ले जानकारी मंगाए जात हे। घटना म संलिप्त अऊ गिरोह के मुख्य सरगना साहेबगंज झारखण्ड़ निवासी प्रेम नोनिया संग गौतम फरार हे, जेकर पतासाजी करके गिरफ्तार करे के हरसंभव प्रयास करे जात हे। चाईल्ड लाईन रायपुर के टीम ये दुनों टूरा मन ले घटना के संबंध म विस्तृत पूछताछ करे जात हे। मामला म अऊ आरोपी मन के सामिल होए के संग अऊ मोबाईल फोन बरामद होए के घलोक संभावना हे। आरोपी अपचारी बालक मन ल किरारा म मकान देवइया मकान मालिक चंद्रप्रकाश धीवर ह ए टूरा मन ल किरायेदार राखे के सूचना थाना तेलीबांधा म नइ देहे गए रहिस, ते पाए के मकान मालिक के विरूद्ध प्रतिबंधात्मक धारा मन के तहत् कार्यवाही करे गए हे।
