मुख्यमंत्री श्री विष्णु देव साय के अगुवई म जन कल्याणकारी योजना मन के लाभ उठावत हें जनता

मोबाइल वेटरिनरी यूनिट कोण्डागांव के सुदूर वनांचल म बन गे आशा के किरण
एम व्ही यू बनिस पशुपालक मन बर वरदान, जानकारी के संग देहे जात हे परामर्श
कोण्डागांव। कोण्डागांव एक आदिवासी बाहुल्य जिला हे, जेमां आजीविका बर मनखे मन किसानी के संग थोक-बहुत पशुपालन घलोक करथें, जेन परिवार के आय के जरिया घलोक हे। अधिकतर पशुपालक सीमित संसाधन के संग पारम्परिक पशुपालन करत हें, अइसन म जब पशु मन म कोनो गंभीर बीमारी आथे, त जानकारी के अभाव अऊ समय म उचित इलाज नइ करा पावंय। अइसन म पशु मन के मृत्यु के संग पशु पालक मन ल आर्थिक नुकसान घलोक होथे। फेर अब ये समे बदलत हे। मुख्यमंत्री श्री विष्णु देव साय के अगुवई म केंद्र अऊ राज्य सरकार के जनकल्याणकारी योजना मन के धरातल म सफल क्रियान्वयन होवत हे।
राज्य सरकार कोति ले सबो वर्ग के विकास बर योजना बनाके ओ मन ल लाभान्वित करे जात हे। शासन कोति ले विशेषकर किसान अऊ पशुपालक मन ल घलोक विशेष प्राथमिकता देहे गए हे। इही सोच के परिणाम हे मोबाइल वेटरिनरी यूनिट, जेन अब कोण्डागांव के सुदूर वनांचल म घलोक आशा के एक नवा किरण बन गे हे। जेमां पहिली बीमार पशु के समय म इलाज संभव नइ हो पात रहिस, अब ओही इलाज पशुपालक मन के चौखट तक आवत हे। एम.वी.यू. सेवा, एलएचडीसीपी योजना के अंतर्गत संचालित हे अऊ जिला के सबो विकासखंड मन म सरलग काम करत हे। 14 सितंबर 2023 ले शुरू होए ये सेवा सिरिफ आँकड़ा म भर नही, भलुक मनखे मन के मुस्कान अऊ भरोसा म दिखत हे।
साल 2024-25 म अब तक ये सेवा जिला के 4643 गांव मन तक पहुँचे हे अऊ एम.वी.यू ले 56210 पशु-पक्षि मनके इलाज करे गए हे, संगेच 56410 पशुपालक मन ल निःशुल्क दवाई बांटे गए हे। 578 गाय मन म कृत्रिम, 3150 निकृष्ट बइला मन के बधियाकरण, 23002 पशु मन के जांच करे गए हे अऊ 135586 पशु-पक्षी मन के टीकाकरण करके ओ मन ल बीमारी ले सुरक्षित करे गए हे।
पशु चिकित्सा विभाग के निर्देशन म एम.वी.यू. रोजेच तीन गांव मन म पहुँचत हे अऊ न केवल इलाज करत हे, भलु पशुपालक मन ल जरूरी जानकारी अऊ परामर्श घलोक देत हे। मोबाइल पशु चिकित्सा इकाई सिरिफ इलाज नही, भरोसा अऊ आत्मनिर्भरता लेके आथे। अब जिला के जंगल के बीच न इलाज के देरी हे, न दवई के कमी। ये गाड़ी न केवल पशु मन ल स्वस्थ करे हे, भलुक पालक मन के जीवन ल घलोक नवा दिशा देहे हे।
ग्राम पदनार के पशुपालक श्री पोहड़ो के भइसा के गर्भाशय म ही बछड़ा के मृत्यु हो जाय के सेती वो प्रसव नइ कर पात रहिस। स्थिति गंभीर होत जात रहिस, तब श्री पोहड़ो ह तुरंते मोबाइल वेटरनरी यूनिट ल सूचना दीस। एमवीयू के टीम, जेन पशु मन ल घर पहुँच सेवा प्रदान करे बर कार्यरत हे, सूचना मिलतेच जल्दी मौका म पहुँचीस। डॉक्टर अऊ स्टाफ के सतर्कता अउ अनुभव के चलते मृत बछड़ा ल सुरक्षित रूप ले निकाल ले गीस अऊ भैंस के जीवन बचाए जा सकीस। आज भइसी पूरा स्वस्थ हे अऊ पशुपालक पोहड़ो ह ए सुविधा बर शासन अऊ एमवीयू टीम के आभार व्यक्त करे हे।
अइसनहे ग्राम लंजोड़ा के पशुपालक राकेश महेलवार ह अपन बइला के सड़क दुर्घटना म घायल होके पैर टूटे के सूचना मोबाइल वेटरनरी यूनिट ब्लॉक फरसगांव ल दीस। ब्लॉक फरसगांव म ओ समय चिकित्सक उपलब्‍ध नइ होए के सेती एमवीयू कोण्डागांव के टीम ह लउहे मौका म पहुँचके बइला के अपरेसन करिस। समय म होए इलाज ले बइला के जान बांच गे। अभी हाल म बइला पूरा स्वस्थ हे। पशुपालक राकेश महेलवार ह एमवीयू टीम अऊ प्रशासन के प्रति आभार जताए हे।