मुख्यमंत्री के पहल म रायपुर, कोरबा अऊ कुनकुरी म मॉडल श्रम अन्न केन्द्र शुरू होही
श्रमिक योजना मन के लाभ देहे खातिर श्रमिक मन के शत-प्रतिशत पंजीयन करावव – मंत्री श्री देवांगन
रायपुर, 19 जून 2024। मुख्यमंत्री श्री विष्णु देव साय के अगुवई म सरकार श्रमिक मन बर नवा-नवा फैसला लेवत हे। कामकाजी श्रमिक मन के दिक्कत ल महसूस करत ओ मन ल ऊंखर कार्य स्थल तीर किफायती दर म भोजन उपलब्ध कराए बर मॉडल श्रम अन्न केन्द्र चालू करे के निर्देश देहे गए हे। ये केन्द्र रायपुर, कोरबा अऊ कुनकुरी म खुलही।
श्रम मंत्री श्री लखन लाल देवांगन ह कहिस के मॉडल श्रम अन्न केन्द्र रायपुर के तेलीबांधा, कोरबा के नगर निगम बुधवारी टंकी अऊ कुनकुरी म स्थापित करे जाही। अभी हाल म 9 जिला मन म 24 जगा म श्रम अन्न केंद्र संचालित होवत हे। योजना के विस्तार करत 13 जिला मन के 27 जगा म नवा श्रम अन्न केंद्र शुरु करे जाही। ये संबंध म बैठक काली मंगलवार के नवा रायपुर स्थित मंडल कार्यालय म होइस, जेमा श्रमायुक्त अउ सह-सचिव श्रीमती अलरमेल मंगई डी, छत्तीसगढ़ भवन अउ आन सन्निर्माण कर्मकार मण्डल के सचिव श्रीमती सविता मिश्रा, अपर श्रमायुक्त श्री एस.एल. जांगडे संग श्रम विभाग के अधिकारी मन उपस्थित रहिन।
श्रम मंत्री श्री देवांगन ह श्रम विभाग के मण्डल मन म असंगठित अउ निर्माण श्रमिक मन के पंजीयन, योजना मन के आवेदन मन के निराकरण म श्रमिक मन अभिलेख के सुस्पष्ट मिलान करके शत् प्रतिशत पात्र श्रमिक मन ल लाभ प्रदाय करे जाना सुनिश्चित करे ल कहे हें। एकर संगेच अइसन श्रमिक जिंकर अभिलेख म कमी, गलती पाय जात हे वो श्रमिक मन ले अभिलेख पूरा कराके पंजीयन, योजना के लाभ दिलाना सुनिश्चित करे ल कहे हें। खैरागढ़ जिला के अंतर्गत निर्माण, असंगठित श्रमिक मन के पंजीयन, योजना आवेदन मन म स्वघोषणा प्रमाण पत्र ल अमान्य करके जिला से निरस्त करे गये आवेदन मन ल फेर से जांच करे के निर्देश देहे गये हे।
अधिकारी मन ह बताइन कि प्रदेश म कुल 6,386 कारखाना हे, जेमां 922 जोखिम श्रेणी के कारखाना के रूप म चिन्हित करे गए हे। मुख्यमंत्री निर्माण श्रमिक मन के लइका मन बर प्रदेश म निःशुल्क कोचिंग सहायता योजना संचालित करे जात हे। जेखर अंतर्गत अब तक कुल 1534 आवेदन आए हे। एमां ले 927 आवेदन प्रक्रियाधीन हे। भवन अउ आन सन्निर्माण कर्मकार कल्याण मण्डल के अंतर्गत प्रदेश म कैलेण्डर साल जनवरी 2024 ले मई 2024 तक 2 लाख 47 हजार 742 आवेदन आए हे, जेमें ले 25,700 आवेदन मन के निराकरण करे गए। बैठक के समय श्रम मंत्री ह महतारी जतन योजना, नोनी-बाबू छात्रवृत्ति योजना के समीक्षा करत कहिन कि सबो पात्र श्रमिक परिवार के लइका मन ल एकर लाभ दिलाए जाना सुनिश्चित करव।
श्रम मंत्री ह निर्माण श्रमिक मन के लइका मन ल निजी स्कूल म निःशुल्क शिक्षा देहे बर स्कूल अउ लइका मन के चयन प्रक्रिया चालू करे के निर्देश दीन। उमन बैठक म बहुत जोखिम श्रेणी के कारखाना मन के निरीक्षण हर एक साल 02 ले 03 बार करे अउ निरीक्षण के समय स्वीकृत नक्शा के मुताबिक कारखाना नइ होए अउ कारखाना म देहे जात प्रशिक्षण के जांच करे संबंधी निर्देश अधिकारी मन ल दीन। बैठक म बताइए गीस कि कर्मचारी राज्य बीमा सेवा अंतर्गत संचालित जम्मो 42 औषधालय मन म दवाई के पूर्ति के पर्याप्तता सुनिश्चित करे के निर्देश देहे गये हे, दवई के अभाव म श्रमिक मन ल असुविधा झन होवय। छत्तीसगढ भवन अउ आन सन्निर्माण कर्मकार कल्याण मंडल कोति ले “भवन अउ आन सन्निर्माण कर्मकार कल्याण उपकर अधिनियम 1996“ के तहत् प्रदेश म होवइया निर्माण कार्य म शत् प्रतिशत उपकर के राशि वसूली करे के निर्देश देहे गए हे।
