08 लाख रुपिया के लागत ले बने भवन म लइका मन ल मिलिस सुरक्षित, सफा अऊ सुविधायुक्त माहौल
मुंगेली, जिला के ग्राम पंचायत बछेरा म मनरेगा के अंतर्गत निर्मित आंगनबाड़ी केन्द्र क्रमांक-04 के नवा भवन ग्रामीण क्षेत्र म बेहतर बाल विकास अऊ मातृ-शिशु सेवा के दिशा म एक महत्वपूर्ण पहल बनके आगू आए हे। लगभग 08 लाख रुपिया के लागत ले बने ए भवन अब गांव के नौनिहाल मन बर सुरक्षित, स्वच्छ, आकर्षक अऊ सुविधायुक्त माहौल देवत हे। नवा भवन के निर्माण ले पहिली आंगनबाड़ी केन्द्र सीमित सुविधा वाले भवन म संचालित होत रहिस, जेखर सेती लइका मन के बइठे, खेले, पोषण आहार बांटे अऊ शैक्षणिक गतिविधि मन बर बने सहिन जगा उपलब्ध नइ रहिस। अब आधुनिक भवन मिले ले ए समस्या मन के समाधान होय हे अऊ आंगनबाड़ी के काम ल बेहतर ढंग ले संचालित करे जात हे।
भवन ल विशेष रूप ले लइका मन के अनुकूल बनाय गए हे। भीथिया मन म फल-सब्जी, अक्षर ज्ञान, रंग-बिरंगी फोटो अऊ बाल शिक्षा ले संबंधित आकर्षक पेंटिंग बनाय गए हे। सुंदर अऊ मनमोहक माहौल ले लइका मन म आंगनबाड़ी आए के प्रति उत्साह बाढ़े हे। खेल-आधारित गतिविधि अऊ प्रारंभिक शिक्षा बर हेलमेल जगा मिले ले लइका मन के सीखे के रुचि ल घलोक बढ़ावा मिलत हे। नवा आंगनबाड़ी भवन अब केवल पोषण आहार बांटे के केंद्र नो हे, बल्कि लइका मन के सर्वांगीण विकास, प्रारंभिक शिक्षा, खेल गतिविधि, स्वास्थ्य परीक्षण, टीकाकरण अऊ मातृ-शिशु परामर्श के महत्वपूर्ण केंद्र बन गे हे। गर्भवती अऊ धात्री माता मन ल घलोक इहां नियमित रूप ले स्वास्थ्य, पोषण अऊ देखभाल संबंधी जानकारी देहे जात हे।
मनरेगा के माध्यम ले बने ए भवन ह ग्रामीण विकास के दुहरी रूप प्रस्तुत करे हे। निर्माण काम ले स्थानीय मजदूर मन ल रोजगार मिलिस, उहें गांव के लइका मन के बेहतर भविष्य बर एक स्थायी अऊ उपयोगी सामुदायिक परिसंपत्ति मिल गे हे। ए निर्माण ग्रामीण क्षेत्र मन म रोजगार सृजन के संग शिक्षा, पोषण अऊ स्वास्थ्य सुविधा मन ल मजबूत करे के दिशा म मनरेगा के उपयोगिता ल देखाथे। गांव वाले मन के कहना हे के पहिली आंगनबाड़ी म लइका मन बर बने सहिन सुविधा उपलब्ध नइ रहिस, फेर नवा भवन के बने ले लइका मन ल सुरक्षित अऊ सफा माहौल मिले हे। भीथिया मन म बने रंगीन शैक्षणिक फोटू लइका मन ल मोहवत हे अऊ ओमां सीखे के रुचि बाढ़े हे। एखर ले अभिभावक मन के आंगनबाड़ी केन्द्र के प्रति भरोसा घलोक मजबूत होए हे।