- आधुनिक कृषि पद्धति ल अपनाके करत हे बीज उत्पादन, होवत शानदार आमदनी
- प्रगतिशील कृषक ह जल, जंगल अऊ जमीन के करिस सही उपयोग
कोण्डागांव, 02 मई 2020। विकासखण्ड कोण्डागांव ले 15 कि.मी. दूर उमरगांव के गायता पारा म रहइया चैनू राम मण्डावी अइसे कृषक हे जउन ह कृषि क्षेत्र म एक शानदार मुकाम बनाए हे। वो ह अपन 4 एकड़ के जमीन म सिरिफ तूमा, कोंहड़ा, टिंडा, दोड़का जइसे साग-सब्जी के बीज के उत्पादन करके ये साल करीबन 25 लाख ले जादा आय अर्जित करे हे। एम.ए तक शिक्षित चैनूराम के बताती घर म बड़े होए के सेती ओकर उपर खेती के काम करे के दबाव रहिस, वोकर पिता अऊ चाचा सामान्य कृषक रहिन जबकि माँ घर-गृहस्थी संभालत रहिस। साल 1989-90 म वोखर पिता अऊ चाचा धान जइसे परम्परागत फसल के उत्पादन करके मात्र 5 हजार सालाना कमा पात रहिन, फेर चैनू राम ह एम.ए. पढ़े के बाद कृषि क्षेत्र म कुछ नवा करे के चाह के चलत अपन रुख साग-सब्जी के बीज उत्पादन कोति लगा दीस। शुरुवाती दौर म वो ह साग-सब्जी उगाए के उदीम करिस, फेर जल्दीच ओ ल लागिस के सब्जी के उत्पादन जादा लाभप्रद नइ हे भलुक बीज के उत्पादन फायदेमंद हे। काबर के सब्जी मन के बाजार मूल्य म घट-बढ़ होत रहिथे जेखर से सब्जी विक्रय के समय ओखर मूल्य लागत निकालना मुस्कल हो जाथे। एला देखत वो ह बस्तर क्षेत्र के उन्नतशील कृषक मन ले संपर्क करिस अऊ उंखर से बीज उत्पादन के वैज्ञानिक अउ तकनीकी पहलु मन ल सीखके सब्जी मन के बीज उत्पादन करे के विचार करिस।
