जगदलपुर, विकासखण्ड दरभा के ग्राम चितापुर के युवा किसान संतु ह कृषि विभाग के शासकीय योजना मन के लाभ लेके जैविक खेती करत अपन आर्थिक स्थिति म सुधार करे हे। किसान संतु ह अपन पिता चेंदरू के जइसे खेती ल ही अपन मुख्य व्यवसाय बनाए हे। पैतृक जमीन म संतु ह परंपरागत खेती करत सालभर म केवल एके मौसम (वर्षा आधारित खेती) म फसल ले पात रहिस। वो ह सिंचई के जुगाड़ करके साल भर फसल लेहे अऊ आमदनी बढ़ाए के उदीम सरलग करत रहिस। वोकर दृढ़ इच्छाशक्ति अऊ विभागीय मैदानी कृषि अधिकारी मन के सहयोग ले वो ह साल 2019-20 म सौर सुजला योजनान्तर्गत सोलर पंप अऊ स्प्रिंकलर सेट विभागीय अनुदान म प्राप्त करिस। सिंचाई के व्यवस्था होए के सेती वो ह अब साल भर म दू ले तीन फसल लेहे लगिस जेखर फलस्वरूप आमदनी म बढ़ोतरी होए के संगे संग वोकर जीवन स्तर म घलोक जरूरी अऊ लाभकारी बदलाव आइस। क्षेत्रिय ग्रामीण कृषि विस्तार अधिकारी के मार्गदर्शन म किसान ह धान के उन्नत ‘‘सिस्टम ऑफ राईस इन्टेनसिफिकेशन‘‘ (एसआरआई) तकनीक ले खेती चालू करिस। जेमे प्रति एकड़ मात्र 4 ले 5 किलोग्राम धान के बीज के उपयोग करके 14 ले 16 दिन के पौध ल पैडी मार्कर के सहायता ले धान के रोपाई एक निश्चित दूरी 25 बाई 25 से.मी. म करे जाथे। जेखर से के पौधा मन के बढ़वार बहुत होए के सेती उत्पादन जादा होथे संगेच खेती के लागत म कमी आथे।
सिंचाई सुविधा मन म विस्तार होए के बाद वो ह धान के संग लघुधान्य, दलहन, तिलहन एंव साग-भाजी के खेती चालू करिस जेखर से खाद्य सुरक्षा के संगेच कृषि जोखिम कम होत गीस। फलस्वरूप किसान ह पहिली के तुलना म करीबन 54 हजार रूपिया के अकतहा लाभ प्राप्त करिस। संगेच वोला पौध संरक्षण यंत्र अऊ आन जरूरी उपकरण अनुदान म मिलिस।
जैविक विकासखण्ड दरभा के किसान संतु ह पूर्णतः जैविक विधि ले खेती करत हे। वो ह गुणवत्ता सहित वर्मीकम्पोस्ट अऊ नाडेप कम्पोस्ट (जैविक खाद) के खुदे उत्पादन करत हे। जेखर से जरूरी उर्वरक-खाद बर बाजार उपर वोकर निर्भरता नइ हे। एखर संग आत्मा योजनान्तर्गत जैविक कीटनाशी निर्माण प्रशिक्षण प्राप्त करके वो ह खुदे कीटनाशक के निर्माण करके फसल म उपयोग करत हे। जेखर से के उच्च श्रेणी के उत्पाद प्राप्त होवत हे। वो ह अभी हाले म परम्परागत कृषि विकास योजना, आत्मा योजनान्तर्गत सुगंधित धान, तरूणभोग, बादशाहभोग, लघुधान्य कोदो, अरहर, साग-सब्जी आदि के खेती करत हे। किसान संतु के लगन, दृढ़ निश्चय ले ये सिदघ होवत हे कि, कृषि के क्षेत्र म उन्नत तकनीक के समावेश ले निश्चित रूप ले गुणवत्ता सहित उत्पाद प्राप्त हो सकत हे। संगेच किसान मन के आर्थिक आत्मनिर्भरता के परिकल्पना घलोक साकार हो सकत हे। किसान संतु के सफलता ले प्रोत्साहित होके आस-पास के किसान घलोक कृषि के क्षेत्र म उन्नत तकनीक ल अपनावत हें।
आधुनिक तकनीक अऊ जैविक खेती ले किसान संतु ल मिलिस उपरहा अमदानी
